వైకాపాలో ‘అనంత’ విన్యాసాలు.. అక్కడ ఆయనే స్టార్‌ క్యాంపెయినర్‌

కాకినాడ, న్యూస్‌టుడే: రాష్ట్ర వ్యాప్తంగా సంచలనం సృష్టించిన దళిత యువకుడి హత్యకేసులో నిందితుడైన ఎమ్మెల్సీ అనంతబాబు వైకాపాకు స్టార్‌ క్యాంపెయినర్‌ మాదిరి వ్యవహరిస్తున్నారు. కాకినాడ జిల్లా ప్రత్తిపాడు మండలం పోతులూరులో తెదేపా నాయకుడు శెట్టి సత్తిబాబుతో పాటు పలువురు వైకాపాలో చేరారు. దీనికోసం మంగళవారం నిర్వహించిన సభకు ఆ పార్టీ ప్రత్తిపాడు అభ్యర్థి వరుపుల సుబ్బారావు, కాకినాడ పార్లమెంటు అభ్యర్థి చలమలశెట్టి సునీల్‌తో కలిసి ఎమ్మెల్సీ అనంతబాబు ముఖ్యఅతిథిగా హాజరయ్యారు. ఈ సందర్భంగా గజమాల సత్కారం అందుకున్నారు. నియోజకవర్గంలో జరిగే వైకాపా సభలు, ఆత్మీయ సమావేశాల్లో అనంతబాబు క్రియాశీలకంగా పాల్గొంటున్నారు. సుబ్బారావుకు ఆయన సమీప బంధువు కావడంతో చురుగ్గా వ్యవహరిస్తూ ప్రచార బాధ్యతలను తన భుజాన వేసుకున్నారు.