DK Shivakumar: మరో సర్వే చేశాకే లోక్‌సభ అభ్యర్థుల ప్రకటన: డీకేఎస్‌

బెంగళూరు: మరో దఫా సర్వే నిర్వహించిన తర్వాతే తమ రాష్ట్రం నుంచి లోక్‌సభ  అభ్యర్థులను ప్రకటించనున్నట్లు కాంగ్రెస్‌ రాష్ట్ర అధ్యక్షుడు, కర్ణాటక డిప్యూటీ సీఎం డీకే శివకుమార్‌ (DK shivakumar) అన్నారు. సీఎం సిద్ధరామయ్య (Siddaramaiah), ఏఐసీసీ ప్రధాన కార్యదర్శి,  కాంగ్రెస్‌ కర్ణాటక వ్యవహారాల ఇంఛార్జి రణ్‌దీప్‌ సూర్జేవాలతో పాటు పలువురు నేతలతో బుధవారం ఆయన బెంగళూరులో సమావేశమయ్యారు. ఈ సందర్భంగా విలేకర్లతో మాట్లాడుతూ.. పార్టీ జిల్లా కార్యదర్శులు, కార్యకర్తలు సమర్పించిన సర్వే నివేదికలపై చర్చించామన్నారు. మరో దఫా సర్వే కూడా చేయాలని కోరాం. ఆ తర్వాతే నిర్ణయం తీసుకుంటామని చెప్పారు. ఇప్పటికైతే తుది జాబితా ఖరారు కాలేదని.. తదుపరి సమావేశం దిల్లీలో జరుగుతుందని చెప్పారు.