Nellore: నెల్లూరులో బలవంతంగా అంగన్వాడీ కేంద్రాలను తెరిపిస్తున్న అధికారులు

నెల్లూరు: ఏపీ రాష్ట్రవ్యాప్తంగా అంగన్వాడీల ధర్నా ఎనిమిదో రోజు కొనసాగుతోంది. సమస్యలు పరిష్కరించేవరకూ సమ్మె కొనసాగిస్తామని అంగన్వాడీలు ప్రభుత్వాన్ని హెచ్చరించారు. మరోవైపు ఈ ధర్నాను అణచివేసేందుకు అధికారులు చర్యలు చేపట్టారు. నెల్లూరు జిల్లాలో బలవంతంగా అంగన్వాడీ కేంద్రాలను తెరిపిస్తున్నారు. ఏఎస్‌పేటలో తాళాలు పగలగొట్టి అంగన్వాడీ కేంద్రాన్ని తెరిపించారు. ఆత్మకూరులోని ఎల్‌.ఆర్‌.పల్లిలో స్థానికులు అడ్డుకోవడంతో.. అధికారులు, వాలంటీర్లు వెనుదిరిగారు.

తాళాలు పగలగొట్టడం చట్ట విరుద్ధం: సీపీఎం

అంగన్వాడీల సమస్యల పరిష్కారంలో రాష్ట్ర ప్రభుత్వం విఫలమైందని సీపీఎం రాష్ట్ర కార్యదర్శి శ్రీనివాసరావు విమర్శించారు. విజయవాడలో ఆయన మీడియాతో మాట్లాడారు. అధికారులు బలవంతంగా అంగన్వాడీ కేంద్రాలను తెరుస్తున్నారని.. తాళాలు పగల గొట్టడం చట్ట విరుద్ధమని మండిపడ్డారు. తక్షణమే అంగన్వాడీల సమస్యలు పరిష్కరించాలని డిమాండ్‌ చేశారు.