Tamil Nadu: తనయుడికి డిప్యూటీ సీఎం పదవి?.. స్టాలిన్‌ ఏమన్నారంటే..!

చెన్నై: తన కుమారుడు ఉదయనిధి స్టాలిన్‌ (Udhayanidhi stalin)కు డిప్యూటీ సీఎంగా బాధ్యతలు అప్పగిస్తారనే ప్రచారాన్ని తమిళనాడు ముఖ్యమంత్రి ఎం.కె.స్టాలిన్ (MK Stalin) ఖండించారు. అవి కేవలం సంచలనం సృష్టించాలనే ఉద్దేశంతో పుట్టించిన వదంతులను కొట్టి పారేశారు. తన ఆరోగ్యంపైనా కొంతమంది తప్పుడు సమాచారం ప్రచారం చేస్తున్నట్లు చెప్పారు. ‘‘నేను ఆరోగ్యంగా, ఉల్లాసంగా ఉన్నాను. విధులు నిర్వహిస్తున్నాను’’ అని పొంగల్‌ శుభాకాంక్షల సందేశంలో తెలిపారు.

జనవరి 21న సేలంలో ఉదయనిధి ఆధ్వర్యంలో నిర్వహించనున్న డీఎంకే యువజన విభాగం సమావేశాన్ని వ్యతిరేకిస్తోన్నవారు ఇలాంటి వదంతులు పుట్టిస్తున్నట్లు సీఎం స్టాలిన్‌ పేర్కొన్నారు. రాష్ట్రవ్యాప్తంగా యువత ‘సేలం సదస్సు’కు సిద్ధమవుతున్న తరుణంలో.. తన ఆరోగ్యంపై తప్పుడు ప్రచారం చేస్తున్నారని చెప్పారు. రాష్ట్ర ప్రజలు సంతోషంగా ఉన్నారని.. అలాంటప్పుడు తాను ఆందోళన చెందాల్సిన అవసరం లేదన్నారు.

కుమారుడికి బాధ్యతలు.. డిప్యూటీ సీఎంగా ఉదయనిధి స్టాలిన్‌..?

ఈ వార్తలను ఉదయనిధి స్టాలిన్‌ ఇప్పటికే తోసిపుచ్చారు. అదంతా తప్పుడు ప్రచారమేనని జాతీయ మీడియాకు తెలిపారు. రాష్ట్ర హక్కుల కోసం పోరాడేందుకు ఉద్దేశించిన యువజన విభాగం సదస్సు నుంచి అందరి దృష్టి మరల్చేందుకు కొంతమంది ప్రయత్నిస్తున్నారని ఆరోపించారు. పార్టీ కార్యకర్తలు దీన్ని అనుమతించకూడదన్నారు. రాష్ట్ర హక్కులు, సమాఖ్యవాదాన్ని పరిరక్షించడమే ఈ సదస్సు ఉద్దేశమని, దీన్ని వ్యతిరేకించే వారు దుష్ప్రచారం చేస్తున్నారని మండిపడ్డారు.