Vijayashanthi: భాజపాకు విజయశాంతి రాజీనామా

హైదరాబాద్‌: తెలంగాణ అసెంబ్లీ ఎన్నికల వేళ సినీనటి విజయశాంతి భాజపాకు షాక్‌ ఇచ్చారు. ఆ పార్టీకి రాజీనామా చేశారు. ఈ మేరకు తన రాజీనామా లేఖను భాజపా రాష్ట్ర అధ్యక్షుడు కిషన్‌ రెడ్డికి పంపించారు. ఎల్లుండి కాంగ్రెస్‌ అగ్రనేత రాహుల్‌ గాంధీ సమక్షంలో ఆమె కాంగ్రెస్‌లో చేరే అవకాశం ఉన్నట్లు సమాచారం. 2020లో విజయశాంతి భాజపాలో చేరిన విషయం తెలిసిందే.

విజయశాంతి త్వరలో కాంగ్రెస్‌ పార్టీలో చేరబోతున్నారంటూ ఇటీవల సీనియర్‌నేత మల్లు రవి వ్యాఖ్యానించిన నేపథ్యంలో ఈ పరిణామం చోటుచేసుకోవడం గమనార్హం. నేడో, రేపో ఆమె కాంగ్రెస్‌ గూటికి వస్తారన్నారు. మరోవైపు, అసెంబ్లీ ఎన్నికల సమయంలో కూడా ఆమె పార్టీ కార్యక్రమాల్లో చురుగ్గా పాల్గొనడం లేదు. దీంతో గత కొన్ని రోజులుగా విజయశాంతి పార్టీ మారుతారనే ప్రచారం జరుగుతోంది. ఇప్పటికే భాజపా నుంచి కోమటిరెడ్డి రాజగోపాల్‌ రెడ్డి, ఏనుగు రవీందర్‌రెడ్డి తదితరులు కాంగ్రెస్‌లో చేరగా.. ఇప్పుడు రాములమ్మ సైతం వారి బాటలోనే కాంగ్రెస్‌లో చేరే అవకాశం ఉంది.