దంచికొట్టిన త్రిపాఠి: చెన్నై లక్ష్యం 168

అబుదాబి: చెన్నైతో జరుగుతున్న మ్యాచులో కోల్‌కతా ఫర్వాలేదనిపించింది. ప్రత్యర్థికి 168 పరుగుల లక్ష్యం నిర్దేశించింది. ఆ జట్టు ఓపెనర్‌ రాహుల్‌ త్రిపాఠి (81; 51 బంతుల్లో 8×4, 3×6) వీర విహారం చేశాడు. మొన్నటి వరకు లోయర్‌ ఆర్డర్‌లో ఆడిన అతడిని ఈ సారి ఓపెనర్‌గా పంపించడం విశేషం. తనకిష్టమైన ఓపెనింగ్‌ స్థానంలో అతడు అదరగొట్టాడు. క్రీజులోకి వచ్చినప్పటి నుంచి దూకుడుగా ఆడుతూ జట్టుకు మెరుగైన స్కోరు అందించాడు.

త్రిపాఠి రాణించినప్పటికీ మిగతా ఆటగాళ్ల నుంచి అతడికి మద్దతు దక్కలేదు. లేదంటే ఆ జట్టు భారీ స్కోరు చేసేది. మరో ఓపెనర్‌ శుభ్‌మన్‌ (11) జట్టు స్కోరు 37 వద్దే ఔటయ్యాడు. ఆ తర్వాత నితీశ్‌రాణా (9), సునిల్‌ నరైన్‌(17), ఇయాన్‌ మోర్గాన్‌ (7), ఆండ్రి రసెల్‌ (2) వరుసగా పెవిలియన్‌కు చేరుకున్నారు. చివర్లో కమిన్స్‌ (17*), దినేశ్‌ కార్తీక్‌ (12) కాసిన్ని పరుగులు చేయడంతో కోల్‌కతా 167 స్కోరైనా చేయగలిగింది. చెన్నై బౌలర్లలో డ్వేన్‌ బ్రావో మూడు వికెట్లు తీశాడు. కర్ణ్‌ శర్మ (2), శార్దూల్‌ ఠాకూర్‌ (2), సామ్‌ కరణ్‌ (2) ఫర్వాలేదనిపించారు.