సాయి ప్రణీత్‌ ఔట్‌

బ్యాంకాక్‌: థాయ్‌లాండ్‌ ఓపెన్‌ సూపర్‌ 300 బ్యాడ్మింటన్‌ టోర్నీలో భారత అగ్రశ్రేణి ఆటగాడు భమిడిపాటి సాయి ప్రణీత్‌ పోరాటం ముగిసింది. శుక్రవారం జరిగిన పురుషుల సింగిల్స్‌ క్వార్టర్‌ఫైనల్లో సాయి ప్రణీత్‌ 17-21, 23-21, 18-21తో ఆరో సీడ్‌ షై ఫెంగ్‌ (చైనా) చేతిలో పోరాడి ఓడాడు. గంటా 24 నిమిషాల పాటు హోరాహోరీగా సాగిన పోరులో సాయి ప్రణీత్‌ గట్టి పోటీనిచ్చాడు. మూడో గేమ్‌లో 12-18తో ప్రత్యర్థి దాదాపుగా మ్యాచ్‌కు చేరువైనా సాయి ప్రణీత్‌ ఆశలు వదులుకోలేదు. గొప్పగా పుంజుకుని 16-18తో ఫెంగ్‌ను సమీపించాడు. 18-19తో మరింత చేరువయ్యాడు. ఫెంగ్‌ వరుసగా రెండు పాయింట్లతో సాయి ప్రణీత్‌ పోరాటానికి తెరదించాడు.