రెజ్లర్లతో అలాగేనా?

పోలీసుల తీరుపై ఐఓసీ అభ్యంతరం

దిల్లీ: భారత రెజ్లింగ్‌ సమాఖ్య (డబ్ల్యూఎఫ్‌ఐ) అధ్యక్షుడు బ్రిజ్‌భూషణ్‌ శరణ్‌కు వ్యతిరేకంగా నిరసన చేస్తున్న రెజ్లర్లతో పోలీసులు వ్యవహరించిన తీరును అంతర్జాతీయ ఒలింపిక్‌ కమిటీ (ఐఓసీ) తప్పుబట్టింది. దిల్లీలో నూతన పార్లమెంట్‌ ముందు మహా పంచాయత్‌ కార్యక్రమాన్ని నిర్వహించేందుకు వెళ్లిన రెజ్లర్లను పోలీసులు అడ్డుకుని వారిని లాగి పడేయడంపై తీవ్ర విమర్శలు వ్యక్తమైన సంగతి తెలిసిందే. ఇప్పటికే ప్రపంచ రెజ్లింగ్‌ సమాఖ్య (యుడబ్ల్యూడబ్ల్యూ) దీన్ని ఖండిస్తూ.. నిర్ణీత సమయంలో ఎన్నికలు నిర్వహించకపోతే డబ్ల్యూఎఫ్‌ఐపై సస్పెన్షన్‌ విధిస్తామని హెచ్చరించింది. ఇప్పుడు ఐఓసీ సైతం రెజ్లర్లతో ప్రభుత్వం, పోలీసులు వ్యవహరించిన తీరును ఖండించింది. ‘‘గత వారాంతంలో భారత రెజ్లర్లకు జరిగింది చూసి కలత చెందాం. వారు చేస్తున్న ఆరోపణలపై స్థానిక చట్టాలను అనుసరించి నిష్పక్షపాత క్రిమినల్‌ విచారణ జరగాలని ఐఓసీ కోరుకుంటోంది. దాన్ని అనుసరించి తగు చర్యలూ ఉండాలి. ఈ క్రమంలో క్రీడాకారుల రక్షణకు ఢోకా లేకుండా చూడాలి’’ అని ఐఓసీ పేర్కొంది.