FIFA World cup 2022: అంబరాన్నంటిన అర్జెంటీనా సంబరాలు.. వెల్లువెత్తిన ప్రశంసలు

బ్యూనస్ ఎయిర్స్‌: ఫిఫా ప్రపంచకప్‌(FIFA world cup 2022)లో గెలుపు అర్జెంటీనా అభిమానులను ఉక్కిరిబిక్కిరి చేస్తోంది. ఆదివారం జరిగిన ఫైనల్‌లో దశాబ్దాల నిరీక్షణకు తెరదించుతూ మెస్సి సేన విజయకేతనం ఎగురవేసిన విషయం తెలిసిందే. ఈ నేపథ్యంలో ఆ దేశంలో సంబరాలు మిన్నంటాయి. బాణాసంచా, కారు హారన్‌లతో వీధులన్నీ మోతెక్కాయి. డాన్స్‌లు చేస్తూ, పాటలు పాడుతూ అభిమానులు సందడి చేశారు. లక్షల సంఖ్యలో ప్రజలు వీధుల్లోకి చేరి జాతీయ పతాకాన్ని రెపరెపలాడించారు. ఆర్థిక బాధలతో సతమతమవుతున్న వేళ తమ దేశాన్ని వరించిన ఈ గెలుపు ఎంతో విలువైందంటూ ప్రజలు హర్షం వ్యక్తం చేస్తున్నారు. అర్జెంటీనాలోని సెంట్రల్‌ బ్యూనస్‌ ఎయిర్స్‌లోని ప్రముఖ కట్టడం ఒబెలిస్క్‌ దగ్గరున్న రివర్‌ ప్లేట్‌ ఒడ్డున దాదాపు 20లక్షల మంది చేరి సంబరాలు చేసుకున్నారు. నరాలు తెగే ఉత్కంఠతో సాగిన ఈ మ్యాచ్‌ను భారత క్రికెటర్లు సైతం ఆస్వాదించారు. అర్జెంటీనా(Argentina) సంచలన విజయం నమోదు చేసిన అనంతరం సామాజిక మాధ్యమాల వేదికగా ఆ జట్టుపై ప్రశంసలు కురిపించారు. 

* మెస్సి కల నెరవేర్చిన అర్జెంటీనా జట్టుకు నా అభినందనలు. ఓటమితో తమ ప్రయాణాన్ని ప్రారంభించినా.. అద్భుతంగా పుంజుకున్నారు. అదనపు సమయం ముగియటానికి ముందు మార్టినెజ్‌ గోల్స్‌ను అద్భుతంగా అడ్డుకొనడాన్ని ప్రత్యేకంగా చెప్పాల్సిందే.  అర్జెంటీనా గెలుస్తుందని అప్పుడే అనుకున్నా -సచిన్‌ తెందూల్కర్‌

* ఫైనల్‌లో సంచలనం సృష్టించారు. నాకు తెలిసి ఇదో గొప్ప ముగింపు - షోయబ్‌ అక్తర్‌

* నమ్మశక్యం కాని విధంగా మ్యాచ్‌ ఆడారు. మెస్సీ-ఎంబాపె పోరు మ్యాచ్‌కే హైలైట్‌. మెస్సి అతడి తరంలో అత్యున్నత ఆటగాడనేది నిర్వివాదాంశం. పీలే, మారడోనా తర్వాత మెస్సి ఆ స్థాయి ఆటగాడు. -రవిశాస్త్రి

* వారి గెలుపును ముందే ఊహించా. ప్రపంచ టైటిల్‌ గెలిచిన మెస్సి, అర్జెంటీనాకు అభినందనలు. ఎంబాపె జట్టు అసాధారణంగా పోరాడింది. ఫైనల్‌ మ్యాచ్‌ మాత్రం అదరగొట్టారు. - వసీం జాఫర్‌

* ఫైనల్ పోరును టీమిండియా ఆటగాళ్లంతా కలిసి చూస్తున్న ఫొటోను బీసీసీఐ షేర్‌ చేసింది.