Jagadeesan: ఆ ప్రశ్న సీఎస్‌కేను అడగండి.. ధోనీ మాత్రం చాలా సాయం చేశాడు: జగదీశన్‌

ఇంటర్నెట్ డెస్క్‌: నారాయణ్‌ జగదీశన్‌.. ఇటీవల దేశవాళీ క్రికెట్‌లో సంచలన ఇన్నింగ్స్‌లు ఆడిన ఆటగాడు. విజయ్ హజారే ట్రోఫీలో ఏకంగా ఒకే ఇన్నింగ్స్‌లో 277 పరుగులు చేసి రికార్డు సృష్టించాడు. దీంతో ఐపీఎల్‌ (IPL 2023) మినీ వేలంలో కోల్‌కతా నైట్‌రైడర్స్‌ జగదీశన్‌ను రూ. 90 లక్షలు వెచ్చించి కొనుగోలు చేసింది. గతేడాది చెన్నై సూపర్‌ కింగ్స్‌ ఫ్రాంఛైజీతో ఉన్నప్పటికీ  కేవలం ఏడు మ్యాచుల్లోనే ఆడే అవకాశం వచ్చింది. వచ్చే సీజన్‌లో కోల్‌కతా తరఫున ఆడేందుకు ఉత్సాహంగా ఉన్నట్లు జగదీశన్‌ వెల్లడించాడు. అలాగే చెన్నై జట్టులో ఉన్నప్పుడు ధోనీ ఎంతో మద్దతుగా నిలిచాడని గుర్తు చేసుకొన్నాడు. 

‘‘సీఎస్‌కేలో ఉన్నప్పుడు.. ఎంఎస్ ధోనీతో కలిసి ఆడే అవకాశం రావడం అదృష్టం. ఎలాంటి అనుమానాలు ఉన్నప్పటికీ నిస్సంకోచంగా అడిగేవాడిని. ఎల్లప్పుడూ అందుబాటులో ఉండేవాడు. వికెట్‌ కీపింగ్‌, బ్యాటింగ్‌కు సంబంధించి టెక్నికల్‌ అంశాల్లో సూచనలు ఇచ్చాడు. అలాగే మ్యాచ్‌లో పరిస్థితులకు అనుగుణంగా ఏ విధంగా ఆడాలనేది కూడా తెలుసుకోగలిగా’’ అని జగదీశన్ తెలిపాడు. 

అయితే ఫామ్‌లో ఉన్న తనను సీఎస్‌కే ఎందుకు తీసుకోలేదనే ప్రశ్నకు స్పందించాడు. ‘‘ఇలాంటి ప్రశ్నలను సీఎస్‌కే యాజమాన్యాన్ని అడిగితేనే బాగుంటుంది. దానిపై దృష్టిపెట్టదలుచుకోలేదు. ఆటను మెరుగుపర్చుకోవడమే ప్రస్తుతం నా ముందున్న లక్ష్యం’’ అని ఈ యువ బ్యాటర్‌ స్పష్టం చేశాడు.