Rishabh Pant: లఖ్‌నవూతో మ్యాచ్‌లో.. రిషభ్‌ పంత్‌కు రూ.12 లక్షల జరిమానా

ముంబయి: దిల్లీ కెప్టెన్‌ రిషభ్‌ పంత్‌కు జరిమానా పడింది. గతరాత్రి లఖ్‌నవూతో జరిగిన మ్యాచ్‌లో స్లో ఓవర్‌రేట్‌ కారణంగా టీ20 లీగ్‌ నిర్వాహకులు రూ.12 లక్షల జరిమానా విధించారు. ఈ మ్యాచ్‌లో టాస్‌ ఓడి బ్యాటింగ్‌కు దిగిన దిల్లీ జట్టు నిర్ణీత ఓవర్లలో మూడు వికెట్ల నష్టానికి 149 పరుగులు చేసింది. ఓపెనర్‌ పృథ్వీ షా (61; 34 బంతుల్లో 9x4, 2x6) ధనాధన్‌ ఇన్నింగ్స్‌ ఆడాడు. అనంతరం లఖ్‌నవూ నాలుగు వికెట్లు కోల్పోయి 19.4 ఓవర్లలో లక్ష్యాన్ని ఛేదించింది.

అయితే, మైదానంలో తేమ కారణంగా దిల్లీ 150 పరుగుల లక్ష్యాన్ని కాపాడుకోలేకపోయింది. ఈ క్రమంలోనే లఖ్‌నవూ ఓపెనర్‌ క్వింటన్‌ డికాక్‌ (80; 52 బంతుల్లో 9x4, 2x6) మెరుపు బ్యాటింగ్‌ చేశాడు. చివర్లో ఉత్కంఠకు దారితీసినా.. ఆయుష్‌ (10 నాటౌట్‌) బదోని ఆ జట్టును గెలిపించాడు. మరోవైపు దిల్లీకి ఈ సీజన్‌లో ఇది వరుసగా రెండో ఓటమి కావడం గమనార్హం. మొత్తంగా ఆడిన మూడు మ్యాచ్‌ల్లో ఒకటే విజయం సాధించింది. తొలి మ్యాచ్‌లో ముంబయిపై విజయం సాధించిన ఆ జట్టు తర్వాత గుజరాత్‌, లఖ్‌నవూ జట్లతో ఓటమిపాలైంది. దీంతో పాయింట్ల పట్టికలో ప్రస్తుతం ఏడో స్థానంలో కొనసాగుతోంది.