IND vs SA : తొలి ఇన్నింగ్స్‌లో టీమ్‌ఇండియా ఆలౌట్‌

విరాట్ సూపర్‌ ఇన్నింగ్స్

తేలిపోయిన మిగతా బ్యాటర్లు

ఇంటర్నెట్ డెస్క్‌: కీలకమైన కేప్‌టౌన్‌ టెస్టులో తొలి రోజే టీమ్ఇండియా ఆలౌటైంది. దక్షిణాఫ్రికాతో జరుగుతున్న మూడో టెస్టు మ్యాచ్‌లో భారత్‌ మొదటి ఇన్నింగ్స్‌లో 223 పరుగులకే ఆలౌటైంది. కెప్టెన్‌ విరాట్ కోహ్లీ (79) అద్భుతంగా రాణించినా కీలకమైన సమయంలో పెవిలియన్‌కు చేరాడు. ఛెతేశ్వర్‌ పుజారా (43), రిషభ్‌ పంత్ (27) ఫర్వాలేదనిపించారు. కేఎల్‌ రాహుల్‌ 12, మయాంక్ అగర్వాల్‌ 15, అజింక్య రహానె 9, అశ్విన్‌ 2, శార్దూల్‌ ఠాకూర్‌ 12, ఉమేశ్‌ 4*, షమీ 7 పరుగులు చేశారు. సఫారీల బౌలర్లలో రబాడ 4, జాన్‌సెన్ 3.. ఒలివియర్‌, కేశవ్‌, ఎంగిడి మహరాజ్‌ చెరో వికెట్‌ తీశారు.

ఆ ముగ్గురు మినహా.. 

దక్షిణాఫ్రికా బౌలర్లు కట్టుదిట్టంగా బౌలింగ్‌ చేయడంతో కోహ్లీ, పుజారా, పంత్ మినహా భారత బ్యాటర్లు క్రీజ్‌లో నిలబడలేకపోయారు. ఆఖరి వరకు ఎంతో ఓపికగా ఆడిన కోహ్లీ శతకం చేసేలా కనిపించాడు. అయితే ఓ పక్క వికెట్లు పడుతుండటంతో స్కోరు బోర్డు వేగం పెంచేందుకు ప్రయత్నించే క్రమంలో పెవిలియన్‌కు చేరాడు. పుజారా కూడా నిలదొక్కుకున్నా భారీ స్కోరు సాధించలేకపోయాడు. రిషభ్‌ పంత్‌ ఉన్నంతసేపు ఆత్మ విశ్వాసంతో కనిపించాడు. ఇక మిగతా బ్యాటర్లు ప్రభావం చూపలేకపోయారు. భారత బౌలర్లు విజృంభిస్తే గానీ మ్యాచ్‌పై పట్టు సాధించే అవకాశం ఉండదు.