IND vs WI: వరుసగా రెండు బౌండరీలు కొట్టేసరికి.. సిరాజ్‌ ఏం చేశాడో చూడండి..!

అహ్మదాబాద్‌: వెస్టిండీస్‌ ఓపెనర్‌ షాయ్‌ హోప్‌కు టీమ్‌ఇండియా పేసర్‌ మహ్మద్‌ సిరాజ్‌ దీటుగా బదులిచ్చాడు. ఆదివారం వెస్టిండీస్‌తో జరిగిన తొలి వన్డేలో టాస్‌ గెలిచి బౌలింగ్‌ ఎంచుకున్న భారత్‌కు ఈ హైదరాబాదీ పేసర్‌ శుభారంభం ఇచ్చిన సంగతి తెలిసిందే. తొలి ఓవర్‌ను మెయిడిన్‌గా పూర్తి చేసిన అతడు తన తర్వాతి ఓవర్‌లో రెండు బౌండరీలు సమర్పించుకున్నాడు. సిరాజ్‌ వేసిన మూడో ఓవర్‌ తొలి బంతిని వదిలేసిన హోప్‌ తర్వాతి రెండు బంతులను వరుసగా బౌండరీలకు తరలించాడు. ఈ క్రమంలోనే టీమ్‌ఇండియా పేసర్‌ నిరాశకు గురికాకుండా నాలుగో బంతిని ఇన్‌స్వింగర్‌ వేశాడు. ఆ బంతిని ఆడిన హోప్‌ ఇన్‌సైడ్‌ ఎడ్జ్‌గా బౌల్డ్‌ అయి వెనుదిరిగాడు. దీంతో భారత్‌కు శుభారంభం దక్కింది.  ప్రస్తుతం ఈ వీడియో నెట్టింట్లో వైరల్‌గా మారింది. టీమ్‌ఇండియా పేసర్ దీటుగా బదులిచ్చాడని అభిమానులు వ్యాఖ్యలు చేస్తున్నారు.