Harshada Garud: 12 ఏళ్లకే 50 కేజీల బియ్యం బస్తా ఎత్తి.. ఇప్పుడు పసిడిని ముద్దాడి..!

ఇంటర్నెట్‌డెస్క్‌: అది మహారాష్ట్రలోని పుణె శివారులో ఉన్న వడగావ్‌ అనే చిన్న గ్రామం. ఓ 12 ఏళ్ల అమ్మాయి తన తండ్రి బియ్యం బస్తాలు ఇంట్లోకి మోస్తూ ఇబ్బంది పడుతుంటే చూస్తూ ఊరుకోలేకపోయిది. పరుగున వెళ్లి ఓ 50 కేజీల బస్తాను అమాంతం వీపుకెత్తుకుని వెళ్లింది. చేతులకంటిన దుమ్ము దులుపుకొంటూ మరో బస్తాను మోసుకెళ్లింది. కూతుర్ని అలాగే చూస్తూ ఉండిపోయిన ఆ తండ్రి.. తన బిడ్డను ఎలాగైనా వెయిట్‌లిఫ్టర్‌ చేయాలనుకున్నాడు. కట్‌ చేస్తే.. సరిగ్గా ఆరేళ్ల తర్వాత ఆ తండ్రి కలను నెరవేరుస్తూ అంతర్జాతీయ వేదికపై పసిడి పతకాన్ని ముద్దాడిందా అమ్మాయి. ఆమే 18 ఏళ్ల హర్షద శరద్‌ గరుడ్‌.

ఐడబ్ల్యూఎఫ్‌ జూనియర్‌ వరల్డ్‌ ఛాంపియన్‌షిప్‌లో భారత వెయిట్‌ లిఫ్టర్‌ హర్షద స్వర్ణ పతకం కైవసం చేసుకుంది. ఈ ఘనత సాధించిన తొలి భారత క్రీడాకారిణిగా సరికొత్త రికార్డు సృష్టించింది. గ్రీస్‌లో జరిగిన ఈ పోటీల్లో మహిళల 45 కేజీల విభాగంలో స్నాచ్‌లో 70 కేజీలు, క్లీన్‌ అండ్‌ జెర్క్‌లో 83 కేజీలతో మొత్తం 153 కిలోల బరువులెత్తి జూనియర్‌ ప్రపంచ ఛాంపియన్‌గా నిలిచింది. అయితే ఈ ఘనత వెనుక తండ్రి కల, ఆమె కఠోర శ్రమ ఉన్నాయి.

హర్షద తండ్రి శరద్‌కు చిన్నప్పటి నుంచి క్రీడలంటే ఆసక్తి. వెయిట్‌లిఫ్టింగ్‌లో కోచింగ్‌ కూడా తీసుకున్నారు. రాష్ట్ర స్థాయి పాఠశాల పోటీల్లో వెయిట్‌లిఫ్టింగ్‌లో రజతపతకం గెలుచుకున్నారు. అయితే ఆ తర్వాత శరద్‌ తండ్రి మరణించడంతో కుటుంబపోషణ భారం తనపై పడింది. దీంతో తన కలను పక్కనబెట్టి ఉపాధిపై దృష్టిపెట్టారు. అయితే తన పిల్లలతోనైనా తన కలను నెరవేర్చుకోవాలనుకున్నారు. తొలి సంతానంగా హర్షద పుట్టగానే ఆమెను వెయిట్‌లిఫ్టర్‌ను చేయాలనుకున్నారు. హర్షద కూడా చిన్నతనం నుంచి చదువు కంటే ఆటలపైనే ఎక్కువగా ఆసక్తి పెట్టేది.

హర్షద ఎనిమిదో తరగతి చదువుతున్నప్పుడు ఒక రోజు 50 కేజీల బియ్యం బస్తా ఎత్తేసింది. ఇది చూసి శరద్‌ ఆనందానికి అవధుల్లేకుండా పోయాయి. తన కుమార్తె కచ్చితంగా గొప్ప అథ్లెట్ అవుతుందని అప్పుడే డిసైడ్‌ అయిన శరద్‌.. హర్షదకు అప్పటి నుంచి ప్రత్యేక శిక్షణ ఇప్పించారు. దిగువ మధ్య తరగతి కుటుంబమే అయినప్పటికీ కుమార్తెకు అన్ని సౌకర్యాలు కల్పించేందుకు ఎంతో కష్టపడ్డారు. 

టీచర్‌ మాటను సవాల్‌గా తీసుకుని..

హర్షదకు పట్టుదల చాలా ఎక్కువ. చిన్నప్పుడు సరిగా చదవడం లేదని ఓ ఉపాధ్యాయుడు ఆమెను మందలించారట. కనీసం పాస్‌ మార్క్‌లు కూడా రావని హేళనగా మాట్లాడారు. దీంతో సవాల్‌గా తీసుకున్న హర్షద పట్టుబట్టి చదవి పాసవడం గాక, ఫస్ట్‌ క్లాస్‌ తెచ్చుకుంది. వెంటనే ఆ ఉపాధ్యాయుడి దగ్గరకు వెళ్లి తాను సాధించానంటూ స్వీట్లు కూడా పంచిందని ఆమె తండ్రి గుర్తు చేసుకున్నారు. ఇదే పట్టుదల తన శిక్షణలోనూ కన్పించేదని శరద్‌ అన్నారు. ఎంతటి కఠినమైన సాధననైనా ఆనందంగా చేసేదని తెలిపారు.

ఫుడ్‌ పాయిజనింగ్‌తో 10 రోజులు ఆసుపత్రిలో..

జూనియర్‌ స్థాయి ప్రపంచ ఛాంపియన్‌ షిప్‌ పోటీలకు వెళ్లడానికి రెండు నెలల ముందు హర్షదకు ఫుడ్‌ పాయిజనింగ్‌ అయ్యింది. దీంతో 10 రోజుల పాటు ఆసుపత్రిలో ఉండాల్సి వచ్చింది. ఆ కారణంగా యూనివర్శిటీ స్థాయి పోటీల్లో కూడా పాల్గొనలేదు. దాదాపు ఒక నెల పాటు ఆమె కోచింగ్‌కు దూరంగా ఉంది. దీంతో ఆమె వరల్డ్‌ ఛాంపియన్‌ పోటీలకు వెళ్లగలదో లేదో అని ఆమె తండ్రి ఆందోళనకు గురయ్యారు. ‘‘ఈ పోటీలకు వెళ్లేముందు హర్షద నాతో ఒకే మాట చెప్పింది. స్వర్ణాన్ని మాత్రం కోల్పోను అని అంది. అన్నట్లుగానే పసిడి సాధించింది. అనారోగ్యం వేధించినా నా కుమార్తె పట్టుదలతో నా కల నెరవేర్చింది’’ అని శరద్‌ భావోద్వేగంతో చెప్పుకొచ్చారు.