Britain: రష్యాను ఎదుర్కోవడానికి ఉక్రెయిన్‌కు 10,000 డ్రోన్లు: బ్రిటన్‌

లండన్‌: రష్యా (Russia)ను సమర్థంగా ఎదుర్కోవడానికి ఉక్రెయిన్‌ (Ukraine)కు 10,000 డ్రోన్లు అందిస్తామని బ్రిటన్‌ (Britain) తెలిపింది. ఆ దేశ రక్షణ శాఖ మంత్రి గ్రాంట్‌ షాప్స్‌ కీవ్‌లో ఉక్రెయిన్‌ అధ్యక్షుడు జెలెన్‌స్కీతో గురువారం భేటీ అయ్యారు. ఈ సందర్భంగా ఆయన ఈ ప్రకటన చేశారు. గతంలో డ్రోన్ల కోసం ఉక్రెయిన్‌కు 256 మిలియన్‌ డాలర్ల ప్యాకేజీని బ్రిటన్‌ ప్రకటించింది. దానికి అదనంగా మరో 160 మిలియన్‌ డాలర్లను ఈ డ్రోన్ల కోసం కేటాయించారు. ఈ ఆయుధ ప్యాకేజీలో 1,000 కమికేజ్‌ (వన్‌వే అటాక్‌) డ్రోన్లు ఉండనున్నాయి. ఇవి నౌకలను లక్ష్యంగా చేసుకుని దాడి చేయగలవు. యూకే అందించిన ఆయుధాలతో ఉక్రెయిన్‌ బలగాలు నల్ల సముద్రంలో రష్యా నౌకాదళంపై సమర్థంగా దాడి చేస్తున్నట్లు షాప్స్‌ ఈ సందర్భంగా తెలిపారు. కొద్దిరోజులుగా రష్యా నౌకాదళంపై అనూహ్య దాడులు జరుగుతున్నాయి. రెండు రోజుల క్రితం సైతం నల్లసముద్రంలో పెట్రోలింగ్‌ చేస్తున్న రష్యా యుద్ధనౌకను ఉక్రెయిన్‌ సముద్ర డోన్లు ధ్వంసం చేశాయి. ఈ ఘటనలో అది తీవ్రంగా దెబ్బతింది.