అనారోగ్యంతో ఆస్పత్రికి.. చూస్తే పొట్టనిండా వెంట్రుకలే!

ఇంటర్నెట్‌ డెస్క్‌: ఆహారం తీసుకోలేని స్థితిలో అనారోగ్యంతో ఆస్పత్రిలో చేరింది ఓ బాలిక. ఆమెకు వైద్య పరీక్షలు నిర్వహించిన వైద్యులు నిర్ఘాంతపోయారు. పొట్టనిండా వెంట్రకలు ఉండడం చూసి ఆశ్చర్యపోయారు. శస్త్ర చికిత్స అనంతరం పొట్ట నుంచి 3 కేజీల బరువైన వెంట్రుకలతో కూడిన బంతిని బయటకు తీశారు. ఈ ఘటన చైనాలో చోటుచేసుకుంది. షాన్‌క్సీ ప్రావిన్స్‌కు చెందిన ఓ బాలిక పికా అనే రుగ్మతతో బాధపడుతోంది. ఈ రుగ్మత ఉన్న వారు మట్టి, పేపర్లు వంటివి తింటుంటారు. ఈ బాలిక మాత్రం తన తలపై వెంట్రుకలను తానే తినడం అలవాటుగా మార్చుకుంది. పొట్టలో తినడానికి మరేమాత్రం చోటు లేనంతలా ఆమె తన వెంట్రుకలను తానే ఆరగించింది.

ఆస్పత్రిలో చేరే సమయానికి  బోడి గుండుతో ఉన్న ఆ బాలికను పరీక్షించిన వైద్యులు.. పొట్ట నిండా వెంట్రుకలు ఉండడాన్ని గుర్తించారు. సుమారు రెండున్నర గంటల పాటు శస్త్ర చికిత్సచేసి ఆమె పొట్టలోంచి వెంట్రుకలను వెలికితీశారు. బాలిక తల్లిదండ్రులు దూరంగా ఉండడంతో తాతయ్య, నానమ్మ దగ్గరే పెరుగుతోంది. పరిస్థితి విషమించేవరకు వారూ ఈ విషయాన్ని గుర్తించలేదని వైద్యులు తెలిపారు. కొన్నేళ్లుగా ఆ చిన్నారి ఈ రుగ్మతతో బాధపడుతోందని చెప్పారు. సాధారణంగా జుట్టు ఆరగించే అలవాటు ఉన్న వారు ప్రాణాలు సైతం కోల్పోయిన సందర్భాలున్నాయి. 2017లో ఓ బాలుడు జుట్టు కారణంగా పొట్టలో ఇన్‌ఫెక్షన్‌తో మరణించాడు. కాబట్టి ఇలాంటి రుగ్మతలు ఉన్న పిల్లలను తల్లిదండ్రులే దగ్గరుండి చూసుకోవాలని బాలికకు ఆపరేషన్‌ చేసిన వైద్యుడు సూచించారు.