Gender discrimination in AI: ఏఐలోనూ లింగవివక్ష!

దిల్లీ: లింగ వివక్ష అనేది మనుషుల్లోనే కాదు.. కృత్రిమ మేధ (ఏఐ)లోనూ ఉందని ఆస్ట్రేలియా, న్యూజిలాండ్‌ శాస్త్రవేత్తల పరిశోధనలో వెల్లడైంది. అది అందించే సమాచారం, చిత్రాల్లో ఈ పోకడ కనిపిస్తోందని వారు పేర్కొన్నారు. మంచి, చెడు నాయకుడి లక్షణాలకు సంబంధించి ఏఐ అందించిన కంటెంట్‌ను విశ్లేషించినప్పుడు పురుషులను బలమైన, సమర్థ నేతలుగా అది చిత్రీకరిస్తున్నట్లు తేలింది. భావోద్వేగాలతో నిండిపోయిన, అంతగా సమర్థతలేనివారిగా మహిళలను వర్ణిస్తున్నట్లు వెల్లడైంది. ఈ నేపథ్యంలో ఏఐ అందించే డేటా హానికర లింగ వివక్షను వ్యాప్తి చేసే ప్రమాదం ఉందని పరిశోధకులు హెచ్చరిస్తున్నారు. ‘‘నాయకత్వం గురించి తొలుత వెలువడ్డ డేటాలో మహిళా నేతల గురించి ప్రస్తావనే లేదు. వారిని ఉదాహరణలుగా పేర్కొనలేదు. నిర్దిష్టంగా మహిళా నాయకుల గురించి అడిగినప్పుడే వారి ప్రస్తావనను ఏఐ చేసింది’’ అని పరిశోధనకు నాయకత్వం వహించిన టోబీ న్యూస్టెడ్‌ పేర్కొన్నారు. అనేక రంగాల్లో ఏఐ విస్తృతి పెరుగుతున్నందువల్ల వాటిపై మరింత పర్యవేక్షణ ఉండాల్సిన అవసరాన్ని ఇది సూచిస్తోందని వివరించారు.