నా సిబ్బందే.. నన్ను మోసం చేశారు

అధికార రహస్యాల చట్టం సవరణ బిల్లుపై సంతకం చేయలేదు
పాక్‌ అధ్యక్షుడు ఆరిఫ్‌ అల్వీ సంచలన ప్రకటన

ఇస్లామాబాద్‌: పాక్‌ రాజకీయాల్లో ఆదివారం మరో నాటకీయ పరిణామం చోటు చేసుకుంది. దీనికి ఆ దేశ అధ్యక్షుడు ఆరిఫ్‌ అల్వీ కేంద్ర బిందువయ్యారు. చట్టంగా రూపొందిన అధికార రహస్యాల, పాక్‌ సైన్య చట్టాల సవరణ బిల్లులపై తాను సంతకాలు చేయలేదంటూ బాంబు పేల్చారు. ‘‘అల్లాయే సాక్ష్యం. ఈ సవరణ బిల్లులపై సంతకాలు చేయలేదు. వీటితో విభేదించాను. సంతకం చేయని ఆ బిల్లులను నిర్దిష్ట సమయంలో తిరిగి పంపమని చెప్పాను. కానీ నా సిబ్బందే నన్ను మోసం చేశారు. నా అధికారాన్ని ఖాతరు చేయలేదు’’ అని పేర్కొన్నారు. ప్రస్తుతం అటక్‌ జైల్లో ఉన్న తెహ్రీక్‌-ఎ-ఇన్సాఫ్‌ ఛైర్మన్‌ ఇమ్రాన్‌ఖాన్‌కు అల్వీ సన్నిహితుడని పేరు ఉంది. ఈ అధికార రహస్యాల చట్టం ప్రకారమే శనివారం ఇమ్రాన్‌ మరో సన్నిహితుడు షా మహమ్మద్‌ ఖురేషీని పోలీసులు అరెస్టు చేయడం గమనార్హం. అల్వీ ప్రకటనను న్యాయ మంత్రిత్వశాఖ ఖండించింది. రాజ్యాంగంలోని అధికరణం 5 కింద నిర్దిష్ట సమయంలో బిల్లులను అధ్యక్షుడు పంపించలేదని.. అందుకే అవి చట్టాల కింద మారాయని పేర్కొంది.