Hafiz Saeed: పాక్‌ ఎన్నికల్లో హఫీజ్‌ సయీద్‌ పార్టీ పోటీ.. భారత్‌ ఏమందంటే..?

దిల్లీ: లష్కరే తోయిబా చీఫ్‌, 26/11 దాడుల సూత్రధారి హఫీజ్‌ సయీద్‌ (Hafiz Saeed)కు చెందిన పార్టీ వచ్చే ఏడాది జరగనున్న పాకిస్థాన్‌ (Pakistan) సార్వత్రిక ఎన్నికల్లో పోటీ చేస్తున్న విషయం తెలిసిందే. ఈ పరిణామాలపై భారత విదేశాంగ శాఖ (MEA) తాజాగా స్పందించింది. ఇది ఆసియా ప్రాంత భద్రతపై పెను ప్రభావం చూపిస్తుందని హెచ్చరించింది.

‘‘పాకిస్థాన్‌లో ఉగ్రవాద శక్తులు అక్కడి ఎన్నికల్లో పోటీ చేయడం అనేది ఆ దేశ అంతర్గత వ్యవహారం. అందువల్ల దీనిపై మేం స్పందించాలనుకోవడం లేదు. కానీ, ఇది కొత్తేం కాదు. పాక్‌లో సుదీర్ఘకాలంగా అతివాద శక్తులు.. అక్కడి పాలనా వ్యవహారాల్లో భాగంగా ఉన్నాయి. అయితే, ఇటువంటి పరిణామాలు మన ప్రాంతంలో భద్రతాపరంగా తీవ్రమైన చిక్కులను కలిగించే అవకాశముంది. అందువల్ల, మన దేశ భద్రతపై ప్రభావం చూపించే అంశాలపై మేం నిరంతరం దృష్టిపెడుతూనే ఉంటాం’’ అని విదేశాంగశాఖ అధికార ప్రతినిధి అరిందమ్‌ బాగ్చి వెల్లడించారు.

‘హఫీజ్‌ సయీద్‌ అప్పగింత’కు భారత్‌ అభ్యర్థన.. పాక్‌ స్పందన ఇదే..!

‘ది పాకిస్థాన్‌ మర్కజీ ముస్లిం లీగ్‌’ (పీఎంఎంఎల్‌) పేరిట హఫీజ్‌ సయీద్‌ ఓ పార్టీని ఏర్పాటు చేశాడు. ఈ పార్టీ వచ్చే ఏడాది పాక్‌లో జరగబోయే నేషనల్‌, ప్రావిన్షియల్‌ అసెంబ్లీ స్థానాలకు పోటీ చేస్తోంది. ఇదే పార్టీ తరఫున హఫీజ్‌ తనయుడు తల్హా సయీద్‌ ఎన్‌ఏ-127 స్థానం నుంచి బరిలోకి దిగుతున్నాడు.

ఇక, హఫీజ్‌ సయీద్‌ను భారత్‌కు అప్పగించేందుకు ఇటీవల న్యూదిల్లీ.. పాకిస్థాన్‌కు అధికారిక అభ్యర్థన చేసిన విషయం తెలిసిందే. దీనిపై పాక్‌ స్పందిస్తూ.. ఖైదీల అప్పగింతకు ఇరు దేశాల మధ్య ఎలాంటి ఒప్పందం లేదని తెలిపింది.