Crime: విద్యార్థితో లెక్కల టీచర్‌ లైంగిక సంబంధం.. బెయిల్‌పై బయటకొచ్చి మరో బాలుడితో గర్భం..!

ఇంటర్నెట్‌డెస్క్‌: ఆమె ఓ లెక్కల టీచర్‌.. బుద్ధిగా విద్యార్థులకు పాఠాలు చెప్పాల్సిన ఆమె దారితప్పింది. తన వద్ద పాఠాలు నేర్చుకొంటున్న బాలురిపైనే కన్నేసింది. తనకంటే వయస్సులో చాలా చిన్నవాడైన ఒక విద్యార్థిని లొంగదీసుకొంది.  లైంగిక వాంఛలు తీర్చుకొంది. అది వివాదాస్పదమై కోర్టుకు చేరింది. ఆ కేసులో బెయిల్‌పై బయటకు వచ్చిన ఆమె మరో బాలుడిపై కన్నేసి అపార్ట్‌మెంట్‌కు తీసుకెళ్లింది.. వీరి బంధం ముదిరి ఆమె గర్భం దాల్చింది. ఇప్పుడు అది బయటపడటంతో సదరు టీచర్‌ వ్యవహారం యూకేలో సంచలనంగా మారింది. 

బ్రిటన్‌కు చెందిన రెబక్కా జాయ్‌నెస్‌ (30) వ్యవహారం సంచలనంగా మారింది. 2021లో ఓ బాలుడికి లెక్కల్లో అదనపు తరగతులు తీసుకొంది. ఆ సమయంలో  11 అంకెల ఫోన్‌ నెంబర్లో ఒక్కటి తప్ప మిగిలినవి చెప్పింది. తన మొబైల్‌ నెంబర్‌ కనుక్కోవాలని ఛాలెంజ్‌ చేసింది. ఆ తరవాత వారిద్దరి మధ్య సందేశాలతో మొదలైన బంధం బలపడింది. ఒక రోజు ఆ బాలుడిని షాపింగ్‌కు తీసుకెళ్లిన ఆమె.. 345 పౌండ్లు ఖరీదైన గూచీ బెల్ట్‌ కొనిచ్చింది.  సీసీటీవీలో ఈ దృశ్యాలు ఉన్నాయి. ఆ తర్వాత అపార్ట్‌మెంట్‌కు వెళ్లారు. అక్కడ ఇరువురి మధ్య లైంగిక సంబంధం ఏర్పడింది. ఈ విషయాన్ని అతడు తన మిత్రుడికి చెప్పడంతో అది పోలీసులకు చేరింది. దీంతో జాయ్‌నెస్‌ను అరెస్టు చేశారు. ఈ కేసులో ఆమె బెయిల్‌పై బయటకు వచ్చింది. 

ఆ తర్వాత విచారణ సమయంలో జాయ్‌నెస్‌ మరో బాలుడికి దగ్గరైంది. స్నాప్‌ ఛాట్‌లో పరిచయమైన అతడికి తన ఫొటోలు పంపి మెల్లగా ముగ్గులోకి లాగింది. అతడితో కూడా కోర్కెలు తీర్చుకొని గర్భం దాల్చినట్లు ప్రాసిక్యూటర్లు వెల్లడించారు. మరోవైపు జాయ్‌నెస్‌ మాత్రం తాను ఎటువంటి తప్పు చేయలేదని.. ఆ రెండో బాలుడికి 16 ఏళ్లు నిండిన తర్వాతనే సంబంధం పెట్టుకొన్నట్లు చెబుతోంది. బ్రిటన్‌లో సంచలనం సృష్టిస్తున్న ఈ కేసు ప్రస్తుతం విచారణలో ఉంది.