Russia: ఐదు దశాబ్దాల తర్వాత.. మళ్లీ జాబిల్లిపైకి దూసుకెళ్లిన రష్యా రాకెట్‌

(Image Source: RT Twitter)

మాస్కో: దాదాపు ఐదు దశాబ్దాల తర్వాత చంద్రుడిపైకి రష్యా మళ్లీ ప్రయోగం చేపట్టింది. జాబిల్లి దక్షిణ ధ్రువమే లక్ష్యంగా ‘లునా - 25’ పేరుతో రాకెట్‌ను ప్రయోగించింది. ఆ దేశ అంతరిక్ష పరిశోధనా సంస్థ రోస్‌కాస్మోస్‌ విడుదల చేసిన చిత్రాల ప్రకారం.. మాస్కోకు తూర్పున 3,450 మైళ్ల దూరంలోని వోస్తోక్నీ కాస్మోడ్రోమ్‌ ప్రాంతం నుంచి శుక్రవారం వేకువజామున 2.10 గంటలకు ‘లునా - 25’ నింగిలోకి దూసుకెళ్లింది.

కేవలం ఐదు రోజుల్లోనే ఇది చంద్రుడి కక్ష్యలోకి చేరనుంది. ఆ తర్వాత జాబిల్లి (Moon)పై ఎవరూ చేరని దక్షిణ ధ్రువంలో.. మరో 3 లేదా 7 రోజుల్లో ల్యాండర్‌ను దిగేలా ఈ ప్రయోగం చేపట్టారు. అన్ని అనుకూలంగా జరిగితే ఆగస్టు 21వ తేదీన ఈ ల్యాండర్‌ చంద్రుడిపై అడుగుపెట్టనున్నట్లు రోస్‌కాస్మోస్‌ అధికారులు ఓ ఇంటర్వ్యూలో వెల్లడించారు. ఆ తర్వాత ఏడాది పాటు ఇది జాబిల్లిపై పరిశోధనలు జరపనుంది. 1976 తర్వాత రష్యా చేపట్టిన తొలి లూనార్‌ ల్యాండర్‌ ప్రయోగం ఇదే.

ఇప్పటివరకు ఏ దేశ అంతరిక్ష నౌక కూడా చేరుకోని చంద్రుడి దక్షిణ ధ్రువంపై ‘చంద్రయాన్-3’ ద్వారా సాఫ్ట్ ల్యాండింగ్ చేసి చరిత్ర సృష్టించాలని భావిస్తున్న ఇస్రోకు (ISRO).. ‘లునా-25’ ప్రయోగంతో రష్యా (Russia) పోటీ ఇస్తోంది. చంద్రయాన్-3 జాబిల్లి దక్షిణ ధ్రువంపై ఆగస్టు 23న ల్యాండ్ కానుండగా.. అంతకంటే ముందే రష్యా పంపిన లూనా-25 అక్కడే అడుగుపెట్టే అవకాశాలు కన్పిస్తున్నాయి. అయితే, చంద్రయాన్‌-3 మాదిరి కాకుండా ఇది కేవలం ల్యాండర్‌ మిషన్‌ మాత్రమే. కేవలం 30 కేజీల పేలోడ్‌ను మోసుకెళ్తోంది. ఇందులో చంద్రుడిపై మట్టి ఆనవాళ్లను సేకరించేందుకు అవసరమయ్యే రోబోటిక్‌ చేతులు, డ్రిల్లింగ్‌ హార్డ్‌వేర్‌తో పాటు ఇతర శాస్త్రీయ పరికరాలు ఉన్నాయి.

చంద్రయాన్‌-3కి ఇబ్బందులుంటాయా?

జాబిల్లి దక్షిణ ధ్రువంలో గణనీయమైన పరిమాణంలో మంచు ఉంటుందని శాస్త్రవేత్తలు భావిస్తున్నారు. అక్కడ ల్యాండింగ్‌ సవ్యంగా జరిగితే ఆక్సిజన్‌, ఇంధనం, నీరు వంటి వనరులపై సమాచారం సేకరించే అవకాశం లభిస్తుంది. ఈ క్రమంలోనే దక్షిణ ధ్రువంపై ఆగస్టు 23 కంటే ముందే లూనా-25 ల్యాండర్‌ దిగితే అక్కడ అడుగుపెట్టిన తొలి దేశంగా రష్యా చరిత్ర సృష్టించనుంది. అయితే చంద్రయాన్‌-3, లూనా-25 రెండూ దక్షిణ ధ్రువంపై ల్యాండ్‌ అయితే అవి ఢీకొనే ప్రమాదం ఉందా? అనే సందేహాలు వ్యక్తమవుతున్నాయి. దీనిపై రష్యా స్పష్టతనిచ్చింది. ఈ రెండు అంతరిక్ష సంస్థలు ల్యాండింగ్‌ చేయాలనుకున్న ప్రాంతాలు వేర్వేరని పేర్కొంది. అందువల్ల అవి ఢీకొనే ప్రమాదం లేదని వెల్లడించింది.

ఇక, చంద్రయాన్‌-3లో ల్యాండర్‌, రోవర్‌ ప్రొపల్షన్‌ మాడ్యూల్స్‌ ఉన్నాయి. గతంలో చంద్రయాన్‌-2 ప్రయోగం సందర్భంగా ఇస్రో పంపించిన ఆర్బిటర్‌ ఇంకా కక్ష్యలో తిరుగుతోంది. చంద్రయాన్‌-3కి కూడా అదే ఆర్బిటర్‌ను వినియోగించుకోనున్నారు. ఇక, చంద్రయాన్‌-3 పంపే ల్యాండర్‌ జాబిల్లిపై 14 రోజుల పాటు పరిశోధనలు చేయనుంది. రష్యా పంపే లూనా-25 ఏడాదిపాటు జాబిల్లి ఉపరితలంపై పనిచేయనుంది.

ఇస్రో అభినందనలు

లూనా-25ని విజయవంతంగా ప్రయోగించడంపై రష్యా అంతరిక్ష పరిశోధనా సంస్థ రోస్‌కాస్మోస్‌కు భారత అంతరిక్ష పరిశోధనా సంస్థ ఇస్రో అభినందనలు తెలియజేసింది. ‘‘ఈ అంతరిక్ష ప్రయాణంలో మనకు మరో మీటింగ్‌ పాయింట్‌ ఉండటం అద్భుతం’’ అని ట్విటర్‌లో రాసుకొచ్చింది. చంద్రయాన్‌-3, లూనా-25 మిషన్లు తమ లక్ష్యాలను చేరుకోవాలని ఆకాంక్షించింది.