ఆనందం కాదా?

జెన్‌ కథ

ఒక ధనవంతుడు జెన్‌ గురువు దగ్గరికి వెళ్లాడు. ‘స్వామీ! మా కుటుంబ కీర్తిప్రతిష్ఠలు ఇనుమడించేలా, మమ్మల్ని ఆశీర్వదిస్తూ ఏదన్నా రాసివ్వండి. దాన్ని చూసి మా ఇంటిల్లిపాదీ, తర్వాతి తరాలు ఆనందించాలి’ అన్నాడు. వెంటనే ఆ జెన్‌ గురువు ఒక కాగితం తీసుకుని ‘తండ్రి చనిపోతాడు. కొడుకు చనిపోతాడు. మనవడు చనిపోతాడు’ అని రాశాడు. దాన్ని చూసి ఆ ధనవంతుడికి కోపం తన్నుకొచ్చింది. ‘ఏంటి స్వామీ! నేను చెప్పిందేంటి? మీరు రాసిందేంటి? మా కుటుంబం ఆనందించేలా ఏదన్నా రాయమంటే అమంగళంలా చావుల గురించి రాస్తారా? మీకిది సబబా?’ అని అడిగాడు. జెన్‌ గురువు ప్రశాంతంగా నవ్వుతూ ‘నేను రాసిన దాంట్లో తప్పేముంది? ఒకవేళ నీ కొడుకు నీకన్నా ముందే చనిపోయాడనుకో! మీ కుటుంబంలో ఎంత క్షోభ నిండుతుంది. నీ మనవడు నీ కొడుకుకన్నా ముందే మరణించాడనుకో! అదెంత ఆవేదన. ఒక తరం తర్వాత మరో తరం అలా సాగిపోతూండటమే జీవితం. అదే ఏ కుటుంబానికైనా, వంశానికైనా నిజమైన ఆనందం. కాదంటావా?’ ప్రశ్నించాడు గురువు. ఆ ధనవంతుడి నోట మాట లేదు

- శాలిని గుడిపాటి