త్వరగా ఉద్యోగం వచ్చేలా..

ఆరేళ్ల కిందట బీటెక్‌ చేశాను. వ్యక్తిగత సమస్యల వల్ల ఉద్యోగం చేయలేదు. ఇప్పుడు ఏ కోర్సు చేస్తే త్వరగా ఉద్యోగం సంపాదించొచ్చు?

ఎన్‌.చైతన్య

* మీరు బీటెక్‌ చేసి ఆరు సంవత్సరాలు అయిందని చెప్పారు. కానీ ఇంజినీరింగ్‌లో ఏ బ్రాంచి చదివారు, మార్కుల శాతం ఎంత అనే విషయాలు తెలపలేదు. ఆ వివరాలు కూడా చెప్పుంటే మీకు సరైన సూచన ఇవ్వడానికి వీలుండేది. సాధారణంగా బీటెక్‌ చేసినవారు త్వరగా ఉద్యోగం పొందాలనుకొంటే సాఫ్ట్‌వేర్‌కు సంబంధించిన ప్రోగ్రామింగ్‌ కోర్సులు చేయవచ్చు. అవేకాకుండా డిజిటల్‌ మార్కెటింగ్‌, డేటా సైన్స్‌, మెషిన్‌ లెర్నింగ్‌, ఆర్టిఫిషియల్‌ ఇంటెలిజెన్స్‌, బ్లాక్‌ చెయిన్‌, డేటా విజువలైజేషన్‌ లాంటివి కూడా చేయవచ్చు. మీకు ఆసక్తి ఉంటే కంప్యూటర్‌ హార్డ్‌వేర్‌ కోర్సులు కూడా చేసే అవకాశం ఉంది. మీరు బీటెక్‌లో చదివిన బ్రాంచితో ఆ రంగంలో ఉపాధికి ప్రయత్నాలు చేయవచ్చు. డిగ్రీ చదివి చాలాకాలం అయింది కాబట్టి, ఉద్యోగానుభవం లేకుండా ఉద్యోగం రావడానికి కొంత సమయం పట్టే అవకాశం ఉంది. మీకు మరో రెండు/మూడు సంవత్సరాలు చదివే ఓపిక ఉంటే, ఏదైనా ప్రముఖ బిజినెస్‌ స్కూల్‌లో ఎంబీఏ చేయొచ్చు. మీ అభిరుచిని బట్టి జర్నలిజం, ఎంసీఏ, బీఈడీ, ఎల్‌ఎల్‌బీ, ఎకనామిక్స్‌, పబ్లిక్‌ పాలసీ, సైకాలజీ, ఎన్విరాన్‌మెంటల్‌ సైన్స్‌ లాంటి కోర్సులు చదివి, ఉద్యోగావకాశాలను మెరుగుపర్చుకోవచ్చు.

ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌