జిడ్డు చర్మానికి పెరుగు

వానాకాలంలో ముఖం మీద నూనె ఎక్కువగా ఉత్పత్తి అవుతుంటుంది. వాతావరణంలో తేమ శాతం ఎక్కువ కావటంతో మొటిమల వంటి చర్మ సమస్యలూ పెరుగుతుంటాయి. జిడ్డు చర్మం గలవారికివి మరిన్ని చిక్కులు తెచ్చిపెడుతుంటాయ. ఇలాంటివారు చర్మం లోతుల నుంచి శుభ్రమయ్యేలా చూసుకుంటే మంచి ఫలితం కనిపిస్తుంది. ఇందుకు పెరుగు బాగా ఉపయోగ పడుతుంది. కప్పు పెరుగులో రెండు చెంచాల కాఫీ పొడి, ఒక చెంచా పసుపు వేసి ముద్దగా చేసుకోవాలి. దీన్ని ముఖానికి రాసుకొని 15 నిమిషాల తర్వాత శుభ్రంగా కడుక్కోవాలి. పెరుగులోని లాక్టిక్‌ ఆమ్లం చర్మానికి ఎలాంటి హాని చేయకుండానే మృత కణాలను తొలగిస్తుంది. కాఫీ సారం నూనెను పీల్చుకుంటుంది. త్వరగా చర్మం పొడిబారేలా చేస్తుంది. ఇక పసుపు వాపు ప్రక్రియను తగ్గించి, దుష్ప్రభావాలను తట్టుకునేలా చర్మాన్ని బలోపేతం చేస్తుంది.