జంతికలు కరకరలాడేలా రావాలంటే..

జంతికలంటే చాలా ఇష్టం. నేను చేస్తుంటే మెత్తగా వస్తున్నాయి. ఒక్కోసారి మరీ వేగిపోయి... నములుతుంటే నోరు నెప్పెడుతోంది. గుల్లగా, కరకరలాడే జంతికలు రావడానికి ఏవైనా చిట్కాలు ఉంటాయా?

* జంతికలు కరకరలాడే రావడానికి చాలా పద్ధతులు ఉంటాయి. అందులో ఒక పద్ధతి ఇది. కప్పు బియ్యప్పిండికి... రెండు కప్పుల సెనగపిండి తీసుకుని ఉండల్లేకుండా జల్లెడ పట్టుకోవాలి. రెండు చెంచాల వెన్నపూసని కాచి వేడిచేసి పిండిలో వెయ్యాలి. జంతికల పిండిని చన్నీళ్లతో కాక గోరువెచ్చని నీళ్లతో కలిపి చూడండి. పిండిని మరీ గట్టిగా, మరీ జారుగా కాకుండా కలపాలి. అలాగే ముద్ద కలిపిన తర్వాత తడి వస్త్రంతో పైన కప్పేయాలి. ఓ పదిహేను నిమిషాలు ఉంచిన తర్వాతే ఆ పిండిని వాడాలి. అలాగే వేయించేటప్పుడు జంతికలని ఎక్కువ సేపు నూనెలో ఉంచొద్దు. అలా ఉంచితే జంతికలు గట్టిగా ఉంటాయి. రంగుమారగానే జంతికల్ని బయటకు తీసేయాలి. జంతికలు మరీ లావుగా ఉండే గొట్టం నుంచి వేయొద్దు. అవి సరిగా వేగక మెత్తగా ఉంటాయి. పిండిలో చెంచా వాము వేసి చూడండి. చాలా రుచిగా ఉంటాయి. అజీర్తి సమస్యలు రాకుండా ఉంటాయి

ప్రశాంత్‌ కుమార్‌ నీరుండి, యూఎస్‌ఏ, బిర్యానీ బిస్ట్రో, కాలిఫోర్నియా