‘మార్గదర్శి’ మేనేజర్‌ కస్టడీ తిరస్కరణ

ఈనాడు, అమరావతి: తూర్పుగోదావరి జిల్లా రాజమహేంద్రవరం మార్గదర్శి కార్యాలయ మేనేజర్‌ రవిశంకర్‌ను తమ కస్టడీకి ఇవ్వాలని సీఐడీ అధికారులు వేసిన పిటిషన్‌ను మంగళవారం జిల్లా కోర్టు తిరస్కరించింది. సీఐడీ అధికారులు సోమవారం దాఖలు చేసిన కస్టడీ పిటిషన్‌పై విచారణ చేపట్టిన జిల్లా ఇన్‌ఛార్జి ప్రధాన న్యాయమూర్తి కె.సునీత పిటిషన్‌ తిరస్కరిస్తున్నట్లు మంగళవారం వెల్లడించారు. రవిశంకర్‌ బెయిల్‌ పిటిషన్‌పై విచారణను ఈ నెల 23కు వాయిదా వేశారు.

విశాఖ సీతంపేట శాఖ మేనేజర్‌కు బెయిల్‌

రిమాండ్‌లో ఉన్న మార్గదర్శి సీతంపేట శాఖ మేనేజర్‌ కె.రామకృష్ణకు మెట్రోపాలిటన్‌ సెషన్స్‌ న్యాయస్థానం న్యాయమూర్తి ఎం.తిరుమలరావు మంగళవారం షరతులతో కూడిన బెయిల్‌ను మంజూరు చేశారు. ‘రామకృష్ణ రూ.25వేల విలువకు వ్యక్తిగత పూచీకత్తు, అదే విలువకు రెండు ష్యూరిటీలను సమర్పించాలి. న్యాయస్థానం పరిధిని దాటి వెళ్లకూడదు. చందాదారులతో ప్రత్యక్షంగా, పరోక్షంగా సంప్రదింపులు చేయకూడదు. సాక్షులను ప్రభావితం చేయరాదు. తదుపరి ఉత్తర్వులిచ్చే వరకు ప్రతి సోమవారం సీఐడీ కార్యాలయానికి ఉదయం 10 గంటల నుంచి సాయంత్రం 5గంటల లోపు ఏదో ఒక సమయంలో హాజరు కావాలి. సీఐడీ అధికారులకు అందుబాటులో ఉండి విచారణకు సహకరించాలి. విచారణలో ఎటువంటి సహకారం అందించని పక్షంలో సీఐడీ అధికారులు రాతపూర్వకంగా బెయిల్‌ రద్దును కోరవచ్చు...’ అని న్యాయమూర్తి షరతులు విధించారని రామకృష్ణ తరపున వాదనలు వినిపించిన న్యాయవాదులు ఎం.రవి, టి.సత్యశ్రీకాంత్‌ వెల్లడించారు.