Hyderabad News: పోలీసులపై దుర్భాషలు.. మజ్లిస్‌ కార్పొరేటర్‌ అరెస్ట్

హైదరాబాద్‌: ఎంఐఎంకు చెందిన భోలక్‌పూర్‌ కార్పొరేటర్‌ గౌసుద్దీన్‌ను ముషీరాబాద్‌ పోలీసులు అరెస్ట్‌ చేశారు. ఇటీవల పోలీసులపై కార్పొరేటర్‌ దురుసుగా ప్రవర్తించారనే ఆరోపణలపై ఆయన్ను అరెస్ట్‌ చేసి కోర్టులో హాజరుపరిచారు. 

అసలేం జరిగిందంటే..

సోమవారం అర్ధరాత్రి తర్వాత పోలీసులు భోలక్‌పూర్‌ ప్రాంతానికి వెళ్లారు. రోజూ అర్ధరాత్రి దాటిన తర్వాత దుకాణాలు మూసేయాలని స్థానిక దుకాణదారులకు సూచించారు. రంజాన్‌ సందర్భంగా దుకాణాలు తెరుచుకుంటున్నామంటూ కొంతమంది పోలీసులతో వాగ్వాదానికి దిగారు. ఈ క్రమంలో అక్కడికి వచ్చిన కార్పొరేటర్‌ గౌసుద్దీన్‌ పోలీసులపై దుర్భాషలాడారు. దీనికి సంబంధించిన వీడియో సోషల్‌ మీడియాలో వైరల్‌ అయింది. ట్విటర్‌లో ఓ నెటిజన్‌ ఆ వీడియోను పోస్ట్‌ చేస్తూ విషయాన్ని మంత్రి కేటీఆర్‌ దృష్టికి తీసుకెళ్లారు. దీనిపై స్పందించిన మంత్రి.. పోలీసు విధులకు ఆటంకం కలిగించినవారిపై చట్టప్రకారం చర్యలు తీసుకోవాలని డీజీపీని కోరారు. రాష్ట్రంలో ఇలాంటి చర్యలను ఉపేక్షించవద్దని సూచించారు. ఈ నేపథ్యంలో పోలీసులు గౌసుద్దీన్‌ను అరెస్ట్‌ చేసి కోర్టులో హాజరుపరిచారు.