అక్రమ మద్యం.. పట్టించిన గేదెలు

అహ్మదాబాద్‌: అక్రమంగా మద్యం విక్రయిస్తున్న ముగ్గురు రైతుల్ని వారు పెంచుతున్న గేదెలే పట్టించిన ఘటన గుజరాత్‌లో చోటుచేసుకుంది. ఆ రాష్ట్రంలో అక్రమంగా మద్యం విక్రయిస్తే భారీ జరిమానాతో పాటు జైలుశిక్ష కూడా విధిస్తారు. అందుకే ముగ్గురు నిందితులు మందు బాటిళ్లు ఎవరికీ కనిపించకుండా ఉండాలని పశువుల పాకలో గేదెలు నీళ్లు తాగే తొట్టిలో దాచిపెట్టారు. అయితే, ఇటీవల ఆ బాటిళ్లలో ఒకటి పగిలిపోవడంతో అందులో ఉండే మందు నీళ్లలో కలిసిపోయింది. అలా మందు కలిసిన నీటిని తాగిన గేదెలు వింతగా ప్రవర్తించడం, వాటి నోటి నుంచి నురుగ రావడం మొదలైంది. ఇది గమనించిన నిందితుల్లో ఒకరు పశువైద్యుడిని పిలిపించాడు. ఏం జరిగిందా అని వైద్యుడు ఆరా తీయగా.. అసలు విషయం బయటపడింది. దీంతో వైద్యుడు పోలీసులకు సమాచారం ఇవ్వడంతో ముగ్గురు నిందితుల్ని పోలీసులు అరెస్టు చేశారు. వారి నుంచి రూ.32వేలు విలువ చేసే 100 మందు బాటిళ్లు స్వాధీనం చేసుకున్నారు.