శరత్‌ చంద్రారెడ్డికి మధ్యంతర బెయిల్‌

ఈనాడు, దిల్లీ: అరబిందో డైరెక్టర్‌ పెనక శరత్‌ చంద్రారెడ్డికి దిల్లీ రౌస్‌ అవెన్యూలోని సీబీఐ ప్రత్యేక న్యాయస్థానం నాలుగు వారాల మధ్యంతర బెయిల్‌ మంజూరు చేసింది. దిల్లీ మద్యం కేసులో నగదు అక్రమ చలామణి వ్యతిరేక చట్టం (పీఎంఎల్‌ఏ) కింద ఆయనను ఈడీ అరెస్టు చేసిన విషయం విదితమే. ప్రస్తుతం తిహాడ్‌ జైలులో ఉన్న శరత్‌చంద్రారెడ్డి తన భార్య అనారోగ్యం దృష్ట్యా పక్కన ఉండి ఆమెను చూసుకోవాలని, అందుకు 6 వారాలు బెయిల్‌ మంజూరు చేయాలని పిటిషన్‌ దాఖలు చేశారు. ప్రత్యేక జడ్జి ఎంకే నాగ్‌పాల్‌ శనివారం దీనిపై విచారణ చేపట్టారు. అనంతరం శరత్‌చంద్రారెడ్డికి 4వారాలుమధ్యంతర బెయిల్‌ మంజూరు చేశారు. తీర్పునకు సంబంధించిన లిఖితపూర్వక ఉత్తర్వులు వెలువడాలి. తన నాయనమ్మ అంత్యక్రియల నిమిత్తం బెయిల్‌ కోరుతూ శరత్‌చంద్రారెడ్డి జనవరి ఆఖరి వారంలో పిటిషన్‌ దాఖలుచేయగా నాడు ప్రత్యేక న్యాయస్థానం ఆయనకు 14 రోజుల మధ్యంతర బెయిల్‌ మంజూరు చేసింది.