Cyber Crime: ఉచిత థాలీ ఎరలో దిల్లీ మహిళ.. సైబర్‌ మోసానికి గురైన బ్యాంకు ఉద్యోగి

దిల్లీ: ‘‘ఒక థాలీ (భోజనం ప్లేటు) కొంటే.. మరో థాలీ ఉచితం. మా యాప్‌ డౌన్‌లోడ్‌ చేసుకోండి’’ అనే ప్రకటన వలలో పడి నైరుతి దిల్లీ ప్రాంతానికి చెందిన సవితాశర్మ (40) అనే మహిళ రూ.90 వేలు పోగొట్టుకున్నారు. ఓ బ్యాంకులో సీనియర్‌ ఎగ్జిక్యూటివ్‌గా పనిచేస్తున్న సవిత.. ఫేస్‌బుక్‌లో ఉన్న ఈ ఆఫర్‌ గురించి తమ బంధువు ఒకరు చెప్పడంతో ప్రయత్నం చేసినట్లు తెలిపారు.

‘‘సైట్‌లోకి వెళ్లి ఇచ్చిన నంబరుకు కాల్‌ చేశాను. వెంటనే బదులు రాలేదు. ఆ తర్వాత మళ్లీ నాకు ఫోను చేసి ‘‘సాగర్‌ రత్న’’ (ప్రముఖ చైన్‌ రెస్టారెంటు) ఆఫర్‌ గురించి కాలర్‌ చెప్పాడు. ఓ లింక్‌ పంపి, డౌన్‌లోడ్‌ చేసుకోవాలన్నాడు. యాప్‌కు సంబంధించిన యూజర్‌ ఐడీ, పాస్‌వర్డ్‌ పంపాడు. ఆఫర్‌ ఉపయోగించుకోవాలంటే ముందుగా యాప్‌లో రిజిస్టర్‌ చేసుకోవాలన్నాడు. అన్నీ చెప్పినట్టే చేశా. ఆ సమయంలో ఏం చేస్తున్నానో నాకే అర్థం కాలేదు. ఆ తర్వాత నా ఖాతా నుంచి రూ.40 వేలు, రూ.50 వేలు డ్రా చేసినట్లు సందేశాలు వచ్చాయి. ఆ డబ్బు నా క్రెడిట్‌కార్డు నుంచి నా పేటీఎం ఖాతాకు వెళ్లి.. మోసగాడి ఖాతాకు చేరడం ఆశ్చర్యంగా ఉంది. ఈ వివరాలేవీ నేను కాలర్‌కు చెప్పలేదు. వెంటనే నా క్రెడిట్‌కార్డు బ్లాక్‌ చేయించాను’’ అని ఆమె ఫిర్యాదులో పేర్కొన్నారు.