Viral Video: కదిలే జీపు బానెట్‌పై వేడుకలు.. యువతిపై పోలీస్‌ కేసు

సామాజిక మాధ్యమాల్లో గుర్తింపు కోసం నేటి యువత కొందరు దుస్సాహసాలు చేస్తూ కోరి కష్టాలు  తెచ్చుకొంటున్నారు. పంజాబ్‌లోని హోషియాపుర్‌ సమీప దాసుయాకు చెందిన గౌరీ విర్ది (25) అనే యువతి ఇలాగే పోలీసు కేసులో చిక్కుకొంది. ఈమె ఇన్‌స్టాగ్రాం ఖాతాకు మిలియన్‌ (10 లక్షలు) ఫాలోవర్స్‌ రావడంతో ఆ ఆనందంలో కదులుతున్న వాహనంపై ఊరేగింది. జలంధర్‌ - జమ్మూ జాతీయ రహదారిపై ‘1 మిలియన్‌’ బెలూన్‌ చూపుతూ బానెట్‌పై నృత్యం చేసింది. ఈ వీడియో వైరల్‌ కాగానే పోలీసులు రంగంలోకి దిగి ఆమెపై కేసు నమోదు చేశారు. రిజిస్ట్రేషన్‌ నంబర్‌ ఆధారంగా వాహనాన్ని గుర్తించి స్వాధీనం చేసుకున్నారు. రహదారి భద్రతా నిబంధనలు ఉల్లంఘించినందుకు చలాన్‌ కూడా విధించారు.