Telangana News: ప్రేమమోజులో రూ.6 లక్షలతో ఉడాయించిన కూతురు

తండ్రి ఫిర్యాదుతో నగదు స్వాధీనం చేసుకున్న పోలీసులు

మేడిపల్లి, న్యూస్‌టుడే: మేడిపల్లి మండలంలోని ఓ గ్రామానికి చెందిన యువతి ఇంట్లో ఉన్న రూ.6 లక్షలు తీసుకుని ప్రియుడితో కలిసి పారిపోయింది. తండ్రి ఫిర్యాదు మేరకు ప్రేమికులను పట్టుకున్న పోలీసులు వారి నుంచి నగదు స్వాధీనం చేసుకుని తల్లిదండ్రులకు అప్పగించారు. పోలీసులు తెలిపిన వివరాల ప్రకారం..మండలంలోని ఓ గ్రామానికి చెందిన యువతి తన కుటుంబంతో సన్నిహితంగా ఉండే యువకునితో ప్రేమలో పడింది. యువకుని మాటలతో మోసపోయి తన తండ్రి కుటుంబ అవసరాల కోసం ఇంట్లో దాచిన రూ.6 లక్షలు తీసుకుని యువకునితో వెళ్లిపోయింది. ఈ మేరకు తండ్రి ఫిర్యాదు చేయగా పోలీసులు పదిరోజులపాటు గాలించి ప్రేమికుల ఆచూకీతోపాటు వారి నుంచి నగదు స్వాధీనం చేసుకున్నారు. ఈ సందర్భంగా కోరుట్ల సీఐ రాజశేఖర్‌రాజు మాట్లాడుతూ యువతీ, యువకులు ప్రేమపేరిట తప్పుడు మార్గాల్లో వెళ్లి వారి జీవితాలను నాశనం చేసుకోవద్దని సూచించారు. యువతీ, యువకుల ఆచూకీ కనిపెట్టడం, సొమ్మును అప్పగించడంలో చాకచక్యంగా వ్యవహరించిన మేడిపల్లి ఎస్సై సుధీర్‌రావు, సిబ్బంది చంద్రశేఖర్‌, భగవాన్‌, విజయ్‌ను అభినందించారు.