వంట త్వరగా చేయలేదని భార్యను హతమార్చి.. ఆపై ఆత్మహత్య

సీతాపుర్‌: వంట చేయడంలో ఆలస్యమైందని గొడవపెట్టుకున్న భర్త విచక్షణ మరిచి భార్యను హతమార్చాడు. అనంతరం తాను సైతం ఉరివేసుకొని ఆత్మహత్యకు పాల్పడ్డాడు. ఈ ఘటన ఉత్తర్‌ప్రదేశ్‌లోని సీతాపుర్‌ జిల్లా థంగావ్‌ పోలీస్‌స్టేషన్‌ పరిధిలో చోటుచేసుకుంది. మృతులను ప్రేమాదేవి (28), పరశురాం(30)గా గుర్తించారు. 

పోలీసులు తెలిపిన వివరాల ప్రకారం.. పనుల కోసం బయటకెళ్లిన పరశురాం ఇంటికి వచ్చి భోజనం తీసుకురావాలని భార్యను అడిగాడు. వంట సిద్ధం కాకపోవడంతో ఆగ్రహానికి గురైన అతడు భార్యతో గొడవకు దిగాడు. మాటామాటా పెరగడంతో అతడు పదునైన ఆయుధంతో పలుమార్లు దాడిచేసి చంపాడు. అనంతరం జైలుకు వెళ్లాల్సి వస్తుందన్న భయంతో ఇంట్లో గడియపెట్టుకొని ఉరివేసుకొని చనిపోయాడు. పోలీసులు కేసు నమోదు చేసి దర్యాప్తు చేపట్టారు.