Hanamkonda: సీఐ కుమారుడి నిర్లక్ష్యం.. కారు ఢీకొని మహిళ మృతి

కాజీపేట టౌన్‌: ఓటు వేసి వెళ్తుండగా కారు అతి వేగంగా వచ్చి ఢీకొనడంతో గాదె కవిత(35) అనే నర్సు మృతి చెందిన సంఘటన కాజీపేట ఫాతిమానగర్‌లో చోటు చేసుకుంది. పోలీసుల కథనం ప్రకారం.. హనుమకొండ జిల్లాలోని దర్గా కాజీపేటకు చెందిన గాదె జోసెఫ్‌, కవిత భార్యాభర్తలు. వీరిద్దరు గురువారం స్థానిక సెయింట్‌ గాబ్రియేల్‌ పాఠశాలలో ఓటు వేయడానికి ద్విచక్రవాహనంపై వెళ్లారు. ఓటు వేసి తిరిగి ఇంటికి వెళ్తున్న క్రమంలో ద్విచక్రవాహనం ఎక్కుతుండగా ఫాతిమానగర్‌ నుంచి దర్గా వైపు కారు అతి వేగంగా వచ్చి కవితను ఢీకొట్టింది. ఈ ప్రమాదంలో ఆమె తలకు బలమైన గాయాలయ్యాయి. చికిత్స కోసం ఎంజీఎం ఆస్పత్రికి తరలిస్తుండగా మార్గమధ్యలో మృతి చెందారు. నిర్లక్ష్యంగా కారు నడిపిన ఎక్సైజ్‌ సీఐ కుమారుడు వంశీపై చర్యలు తీసుకోవాలని డిమాండ్‌ చేస్తూ కాజీపేట వంతెన వద్ద మృతురాలి బంధువులు శుక్రవారం రాస్తారోకో చేశారు. ఘటనపై కాజీపేట పోలీసు ఇన్స్‌పెక్టర్‌ రాజు కేసు నమోదు చేసి దర్యాప్తు చేస్తున్నారు.