Road Accident: రోడ్డుప్రమాదంలో ఇద్దరి మృతి.. ఐదుగురికి తీవ్ర గాయాలు

ఓబులవారిపల్లె: అన్నమయ్య జిల్లాలో జరిగిన రోడ్డు ప్రమాదంలో ఇద్దరు దుర్మరణం చెందారు. మరో ఐదుగురు తీవ్రంగా గాయపడ్డారు. ఓబులవారిపల్లె మండల పరిధిలోని చిన్నఓరంపాడు వద్ద జాతీయ రహదారిపై ఆదివారం తెల్లవారుజామున ఈ ప్రమాదం జరిగింది.  

స్థానికులు తెలిపిన వివరాల ప్రకారం.. మండలంలోని కటికంవారిపల్లె గ్రామానికి చెందిన 20 మంది టాటాఏస్‌, టాటాసుమో వాహనాల్లో మదనపల్లె వద్ద ఉన్న బోయకొండ గంగమ్మ ఆలయానికి బయలుదేరారు. ఈ క్రమంలో చిన్నఓరంపాడు వద్ద జాతీయ రహదారిపై టాటాఏస్‌ వాహనం ముందు వెళ్తున్న ట్రాక్టర్‌ను.. అదుపు తప్పి ఢీ కొట్టింది. ఈ ప్రమాదంలో వాహనంలోని ఎన్నారి నరసింహులు (57) తలకు తీవ్ర గాయమై అక్కడికక్కడే దుర్మరణం చెందారు. శంకరమ్మ (50)ను ఆస్పత్రికి తరలిస్తుండగా, మార్గంమధ్యలో మృతి చెందింది. తీవ్రంగా గాయపడిన మరో ఐదుగురిని ఆస్పత్రికి తరలించి చికిత్స అందిస్తున్నారు. ఈ ఘటనపై కేసు నమోదు చేసిన పోలీసులు దర్యాప్తు చేపట్టారు.