ఉన్నదంతా ఊడ్చేస్తున్నారు!

పోలవరం ముంపు గ్రామాల్లో జోరుగా చోరీలు

దేవీపట్నం న్యూస్‌టుడే

స్థానికులు ఎదురుపడటంతో దొంగిలించిన ఇనుప సామగ్రి వదిలివెళ్లిన దొంగలు

పోలవరం ప్రాజెక్టు ముంపు గ్రామాలే లక్ష్యంగా దొంగలు చెలరేగిపోతున్నారు. దేవీపట్నం మండలంలోని కొండమొదలు నుంచి గంగంపాలెం వరకు 44 గ్రామాలు ప్రాజెక్టుతో ముంపునకు గురవుతున్నాయి. ఇటీవల కొండమొదలు పంచాయతీతోపాటు మంటూరు నుంచి సీతారం వరకు అనేక గ్రామాలను ఖాళీ చేసి నిర్వాసితులు పునరావాస కాలనీలకు చేరుకున్నారు. గ్రామాల్లో ఎవరూ లేకపోవడంతో మైదాన ప్రాంతాల నుంచి కొంతమంది దొంగలు ఇక్కడకు చేరుకుని ప్రభుత్వ భవనాల్లో ఉన్న ఇనుము, దేవాలయాల్లో ఉన్న గంటలు, హుండీలు, ఇళ్లలో ఉన్న కలపను రాత్రికి రాత్రే తరలించేస్తున్నారు. మైదాన ప్రాంతాల్లో వాటికి అధిక ధర పలకడంతో వేల రూపాయల్లో సొమ్ము చేసుకుంటున్నారు. ప్రస్తుతం గోదావరిలో వరద పూర్తిగా తగ్గడంతో గ్రామాలకు రాకపోకలు సాగుతున్నాయి. దీంతో పొలాల్లో ఉన్న టెలిఫోన్‌, ఇనుప స్తంభాలు, ట్రాన్స్‌ఫార్మర్‌లో ఉన్న రాగి తీగను, తాగునీటి బోర్లలో ఉన్న గొట్టాలు, చిన్నపాటి జనరేటర్లను పోశమ్మగండి మీదుగా మైదాన ప్రాంతానికి తీసుకెళ్లిపోతున్నారు. సంబంధిత అధికారులు స్పందించి తగు చర్యలు చేపట్టాలని నిర్వాసితులు కోరుతున్నారు.

ట్రాన్స్‌ఫార్మర్‌లో ఉన్న రాగి తీసేశారిలా..