స్కానింగ్‌ కేంద్రాలపై నిఘా

సమీక్షిస్తున్న ఆర్డీవో ఏజీ చిన్నికృష్ణ

బాలాజీచెరువు: గర్భస్థ పిండ లింగ నిర్ధారణ నిషేధత చట్టాన్ని పటిష్టంగా అమలు చేయాలని, స్కానింగ్‌ కేంద్రాలపై నిఘా పెట్టాలని కాకినాడ ఆర్డీవో ఏజీ చిన్నికృష్ణ ఆదేశించారు. శనివారం ఆర్డీవో కార్యాలయంలో ఈ చట్టానికి సంబంధించిన వివిధ శాఖల అధికారులతో ఆయన సమావేశం నిర్వహించారు. భ్రూణ హత్యలను నివారించడానికి పటిష్ట చర్యలు చేపట్టాలని సూచించారు. ఆల్ట్రాసౌండ్‌ వైద్య పరీక్షలు లింగ నిర్థారణకు వినియోగించడం నేరమని, నిబంధనలు ఉల్లంఘిస్తే కఠిన చర్యలు తప్పవని హెచ్చరించారు. కాకినాడ డివిజన్‌ స్థాయిలో గుర్తింపు పొందిన 92 స్కానింగ్‌ కేంద్రాలపై డెకాయ్‌ ఆపరేషన్లు, తనిఖీలు నిర్వహించినట్లు చెప్పారు. నాలుగు స్కానింగ్‌ కేంద్రాలు పునరుద్ధరణకు దరఖాస్తు చేసుకోగా, వాటిని ఆమోదించారు. ఈ సమావేశంలో డీఐవో డాక్టర్‌ సీహెచ్‌వీ భరతలక్ష్మి, డాక్టర్‌ బీబీ మోమినా, కె.సింహాద్రి తదితరులు పాల్గొన్నారు.