మౌలిక వసతుల కల్పనలో ప్రభుత్వం విఫలం

పొన్నూరు, న్యూస్‌టుడే: పట్టణ ప్రజలకు మౌలిక వసతులు కల్పించడంలో వైకాపా ప్రభుత్వం పూర్తిగా విఫలమైందని మాజీ ఎమ్మెల్యే ధూళిపాళ్ల నరేంద్రకుమార్‌ పేర్కొన్నారు. బుధవారం పట్టణంలోని 7వ వార్డు, మండలంలోని సూపూడి, మన్నవ గ్రామాల్లో ఎన్నికల ప్రచారం నిర్వహించారు. ఈ సందర్భంగా నిర్వహించిన సమావేశంలో ఆయన మాట్లాడుతూ టిడ్కో గృహాలను కొంత మంది లబ్ధిదారులకు తెదేపా ప్రభుత్వ హయాంలోనే కేటాయించినా..వారికి వైకాపా పాలనలో ఇళ్లు అప్పగించలేదన్నారు. తెదేపా, జనసేన కూటమి అధికారంలోకి రాగానే లబ్ధిదారులకు గృహాలు కేటాయిస్తామన్నారు. మన్నవ గ్రామంలో చివర భూములకు సాగునీరు అందకపోవడంతో రైతులు ఇబ్బందులు పడుతున్నారని, దీనిని తొలగించేందుకు ఎత్తిపోతల పథకానికి నిధులు కేటాయించి దాదాపుగా పనులు పూర్తి చేశామని చెప్పారు. వైకాపా ప్రభుత్వం అధికారంలోకి వచ్చాక మిగిలిన పనులు పూర్తి చేయలేదని ఆవేదన వ్యక్తం చేశారు.