‘వైకాపా నుంచి విముక్తికి ఎదురుచూస్తున్న ప్రజలు’

మాట్లాడుతున్న పెమ్మసాని చంద్రశేఖర్‌, పక్కన రామాంజనేయులు
పెదనందిపాడు, న్యూస్‌టుడే: వైకాపా ప్రభుత్వం ఎప్పుడు పోతుందా అని ప్రజలు ఎదురు చూస్తున్నారని గుంటూరు పార్లమెంట్‌ తెదేపా ఉమ్మడి అభ్యర్థి డాక్టర్‌ పెమ్మసాని చంద్రశేఖర్‌ అన్నారు. మండలంలోని నాగులపాడు సుబ్రహ్మణ్యేశ్వరస్వామి వారి ఆలయంలో ప్రత్తిపాడు నియోజకవర్గ తెదేపా అభ్యర్థి రామాంజనేయులు, జనసేన నియోజకవర్గ ఇన్‌ఛార్జి కొర్రపాటి నాగేశ్వరరావులతో కలసి ఆయన పూజలు నిర్వహించారు. అనంతరం పెదనందిపాడు తెదేపా ఆధ్వర్యంలో ఏర్పాటు చేసిన ఇఫ్తార్‌ విందులో పాల్గొన్నారు. ఈ సందర్భంగా ఏర్పాటు చేసిన సమావేశంలో ఆయన మాట్లాడుతూ ప్రజలలో తెదేపాకు  ఆదరణ పెరుగుతుందన్నారు. ఉపాధి కల్పనకు, పేదరిక నిర్మూలనకు తన వంతు కృషి చేస్తానని హామీ ఇచ్చారు. కార్యక్రమంలో మాజీ ఎంపీపీ నర్రా బాలకృష్ణ, ఖలీల్‌, నాయకులు హర్ష, చెంచయ్య, ప్రసాద్‌, రాకేష్‌, శ్రీనివాసరావు, నాగేశ్వరరావు, నాగబాబు, జనసేన నాయకులు త్రినాథ్‌, నరేంద్ర, మాజీ సర్పంచి సీతారామయ్య తదితరులు పాల్గొన్నారు. తొలుత నాయకులకు రెండు గ్రామాలలో ప్రజలు ఘన స్వాగతం పలికారు.