Telangana News: పార్టీ అధికార ప్రతినిధుల పనితీరుపై బండి సంజయ్‌ మండిపాటు

హైదరాబాద్: భాజపా రాష్ట్ర అధికార ప్రతినిధుల పనితీరుపై ఆ పార్టీ రాష్ట్ర అధ్యక్షుడు బండి సంజయ్‌ తీవ్ర అసంతృప్తి వ్యక్తం చేశారు. అధికార ప్రతినిధులుగా చేయాల్సిన పనులు చేయడంలేదని మండిపడ్డారు. భాజపా రాష్ట్ర కార్యాలయంలో అధికార ప్రతినిధులతో బండి సంజయ్‌ సమావేశమయ్యారు. 9 మంది అధికార ప్రతినిధులు ఉన్నప్పటికీ పార్టీ కోసం ఆశించిన స్థాయిలో పనిచేయడం లేదని ఆగ్రహం వ్యక్తం చేశారు. రాష్ట్ర వ్యాప్తంగా జరుగుతున్న పరిణామాలను ఎప్పటికప్పుడు తెలుసుకుంటూ, సరైన సమయంలో.. సరైన విధంగా స్పందించాలని చెప్పారు. అధికార పార్టీ నేతలు చేసే విమర్శలపై వెంటనే స్పందించాలన్నారు. పార్టీ అధికార ప్రతినిధుల్లో ఒకరు చొప్పున ప్రతిరోజూ పార్టీ కార్యాలయంలో అందుబాటులో ఉండాలని బండి సంజయ్‌ ఆదేశించారు.