CM KCR: తెలంగాణలో భూసమస్యల పరిష్కారానికి మండలాల్లో రెవెన్యూ సదస్సులు

హైదరాబాద్‌: తెలంగాణలో మిగిలిన భూసమస్యల పరిష్కారానికి మండలాల్లో రెవెన్యూ సదస్సులు ఏర్పాటు చేయాలని ముఖ్యమంత్రి కేసీఆర్‌ నిర్ణయించారు. ఈ నెల 15 నుంచి సదస్సులు నిర్వహించాలని వెల్లడించారు. 3 రోజులకు ఒక మండలం చొప్పున మొత్తం 100 బృందాలను ఏర్పాటు చేసి సదస్సులు నిర్వహించాలని సీఎం స్పష్టం చేశారు. జాయింట్ కలెక్టర్, డీఆర్‌వో, ఆర్డీవోల ఆధ్వర్యంలో స్థానిక ఎమ్మెల్యే నేతృత్వంలో ఈ సదస్సులు నిర్వహించాలని తెలిపారు. ఈ మేరకు రాష్ట్రవ్యాప్తంగా రెవెన్యూ సదస్సుల నిర్వహణపై ప్రగతిభవన్‌లో మంత్రులు, ఉన్నతాధికారులతో సీఎం కేసీఆర్‌ మంగళవారం సమీక్ష చేపట్టారు. భూరికార్డుల సమస్యల పరిష్కారంపై సమావేశంలో చర్చించారు.

రెవెన్యూ సదస్సు నిర్వహణకు సంబంధించి అవగాహన కార్యక్రమం ఈ నెల 11న ప్రగతి భవన్‌లో సీఎం కేసీఆర్ అధ్యక్షతన జరగనుంది. ఈ అవగాహన సదస్సుకు మంత్రులు, ఎమ్మెల్యేలు, జిల్లా కలెక్టర్లు హాజరు కానున్నారు.