కార్ల గోదాంలో మంటలు.. ఆరు వాహనాలు దగ్ధం

మంటలను ఆర్పివేస్తున్న అగ్నిమాపక సిబ్బంది

నార్సింగి, న్యూస్‌టుడే: గండిపేట మండలం ఖానాపూర్‌ సమీపంలోని ఓ కార్ల గోదాంలో గురువారం మధ్యాహ్నం చోటు చేసుకున్న అగ్నిప్రమాదంలో మరమ్మతులకు గురైన వాహనాలు ఆహుతయ్యాయి. నగరానికి చెందిన ఓ వ్యాపారి మరమ్మతులకు గురయిన కార్లను ఖానాపూర్‌ సమీపంలోని ఓ గోదాంలో నిల్వ ఉంచారు. సీఎన్జీ గ్యాస్‌తో నడిచే ఈ కార్లను సిబ్బంది ఇక్కడ మరమ్మతు చేస్తుంటారు. గురువారం మధ్యాహ్నం సిబ్బంది భోజనాలు చేస్తున్న సమయంలో ఒక్కసారిగా మంటలంటుకుని కార్లకు వ్యాపించాయి. సిబ్బంది వెంటనే ఫైర్‌స్టేషన్‌కు ఫోన్‌ చేయడంతో మాదాపూర్‌ నుంచి వచ్చిన అగ్నిమాపక సిబ్బంది ఫైర్‌ఇంజిన్‌ సాయంతో మంటలార్పేశారు. కార్లకు మరమ్మతులు చేస్తుండగా గ్యాస్‌ వెల్డింగ్‌ పనిచేస్తుండగా నిప్పురవ్వలు అంటుకుని మంటలు వ్యాపించి ఉంటాయని భావిస్తున్నారు. ప్రమాద సమయంలో గోదాంలో 25 వాహనాలు ఉండగా ఆరు అగ్నికి ఆహుతయ్యాయి. ఈ ప్రమాదానికి సంబంధించి తమకు ఫిర్యాదు అందలేదని గచ్చిబౌలి పోలీసులు తెలిపారు.