‘అల్లాహ్‌ మీద ఒట్టు.. జీవితంలో ఎవరిపై జులుం చేయలేదు’

ప్రసంగిస్తున్న అక్బరుద్దీన్‌ ఒవైసీ

కేశవగిరి, న్యూస్‌టుడే: మతాల మధ్య చిచ్చుపెడుతున్న మోదీ సర్కారును ఓడించేందుకు అందరూ ఓటుహక్కు వినియోగించుకోవాలని మజ్లిస్‌ శాసనసభాపక్ష నేత, చాంద్రాయణగుట్ట ఎమ్మెల్యే అక్బరుద్దీన్‌ ఒవైసీ పిలుపునిచ్చారు. రజాకార్లు, చొరబాటుదారులని విమర్శిస్తున్న వారిని, హిజాబ్‌ బ్యాన్‌, బీఫ్‌ బ్యాన్‌, గడ్డం, వేషధారణ పేరుతో ముస్లింలను వేధిస్తున్న దుష్ట శక్తులను ఓడించాలంటే ఓటే సరైన ఆయుధమన్నారు. పాతబస్తీ ఉప్పుగూడ డివిజన్‌లో శనివారం సాయంత్రం అసదుద్దీన్‌ ఒవైసీ తరఫున ప్రచారం చేశారు. నసీబ్‌నగర్‌లో కార్నర్‌ మీటింగ్‌లో ఆయన ప్రసంగించారు. ‘అల్లాహ్‌ మీద ఒట్టేసి చెబుతున్నా నేను నా జీవితంలో ఎవరిపైనా జులుం చేయలేదు.. చేశానని నిరూపిస్తే రాజకీయ సన్యాసం చేస్తా’ అన్నారు. తన శరీరంలో అన్ని అవయవాలు పాడయ్యాయని.. ఏడాది క్రితం వైద్యులు 3 గంటలు శ్రమించి మృత్యుముఖంలోంచి కాపాడారన్నారు.