కన్హా శాంతివనంలో గ్లోబల్‌ టీన్స్‌ మీట్‌ ప్రారంభం

కార్యక్రమానికి హాజరైన యువత

నందిగామ, న్యూస్‌టుడే: రంగారెడ్డి జిల్లా నందిగామ మండలం కన్హా శాంతివనంలోని ధ్యాన మందిరంలో గ్లోబల్‌ టీన్స్‌ మీట్‌ మంగళవారం ప్రారంభమైంది. ఈ మీట్‌లో దేశవ్యాప్తంగా వివిధ కళాశాలలకు చెందిన 500 మంది యువత ప్రత్యక్షంగా, వర్చువల్‌గా వేల మంది పాల్గొన్నారు. ఈ కార్యక్రమాన్ని హార్ట్‌ఫుల్‌నెస్‌ గ్లోబల్‌గైడ్‌ కమలేష్‌ డి పటేల్‌ ప్రారంభించి మాట్లాడారు. భారతదేశం అత్యధిక యువత కలిగిన దేశమని అన్నారు. అలాంటి యువత మంచి మార్గంలో ప్రయాణించేందుకు ఇలాంటి సదస్సులు ఉపయోగపడుతాయని చెప్పారు. వారం రోజుల పాటు నిర్వహించే సదస్సులో యువత అంతర్గత పరివర్తన, నాయకత్వ శిక్షణ, కమ్యూనికేషన్‌ నైపుణ్యం, ప్రకృతికి ప్రాధాన్యం, కరుణ, సృజనాత్మకతను పెంపొందించడం, చదువుతో పాటు ధ్యానాన్ని జోడించడం, ఆధునిక పరిజ్ఞానం, సమీకృత స్వీయ దిశగా అడుగులు తదితరాలపై అవగాహన కల్పించనున్నట్లు వివరించారు.