రోడ్డు ప్రమాదంలో హనుమాన్‌ దీక్షాపరుడి మృతి

రుద్రంగి, న్యూస్‌టుడే: ద్విచక్ర వాహనాన్ని, టిప్పర్‌ ఢీకొన్న సంఘటనలో హనుమాన్‌ దీక్షాపరుడు మృతి చెందిన సంఘటన చందుర్తి మండలం లింగంపేట-కట్టలింగపేట మధ్య సోమవారం చోటుచేసుకుంది. మృతుని కుటుంబ సభ్యులు, పోలీసులు తెలిపిన వివరాల ప్రకారం... జగిత్యాల జిల్లా కథలాపూర్‌ మండలం తాండ్య్రాల గ్రామానికి చెందిన గడ్డం గంగారెడ్డి (70) అనే వృద్ధుడు, వేములవాడ నుంచి ద్విచక్ర వాహనంపై తాండ్య్రాలకు వస్తుండగా చందుర్తి మండలం లింగంపేటలో రోడ్డు పనుల కోసం కంకర తీసుకువస్తున్న టిప్పర్‌ వెనక నుంచి ఢీకొట్టింది. దీంతో ఆయన అక్కడికక్కడే మృతి చెందాడు. ఈ విషయం తెలుసుకున్న బంధువులు, గ్రామస్థులు సంఘటన స్థలానికి చేరుకుని నిర్లక్ష్యంగా టిప్పర్‌ నడిపి గంగారెడ్డి మృతికి కారణమైన వ్యక్తిని శిక్షించి తమకు న్యాయం చేయాలంటూ కోరుట్ల-వేములవాడ ప్రధాన రహదారిపై ఆందోళనకు దిగారు. దీంతో దాదాపు 2 గంటలు రాకపోకలు నిలిచిపోయాయి. చివరికి సీఐ కిరణ్‌కుమార్‌ ఆధ్వర్యంలో పోలీసులు బలవంతంగా వారిని చెదరగొట్టి మృతదేహాన్ని సిరిసిల్ల ఏరియా ఆసుపత్రికి తరలించారు. మృతునికి భార్య గంగు, అయిదుగురు కుమార్తెలు ఉన్నారు. ఇటీవలే గ్రామంలో సొంతంగా హనుమాన్‌ విగ్రహాన్ని ప్రతిష్ఠించి, హనుమాన్‌ దీక్షలో ఉండగా ప్రమాదంలో గంగారెడ్డి మృతి చెందడంతో కుటుంబీకులు బోరున విలపించారు. ఈ సంఘటనపై కేసు నమోదు చేసినట్లు సీఐ తెలిపారు.