యుద్ధ నౌకలో గవర్నరు

నౌకాదళ అధికారులతో కలిసి యుద్ధనౌక ఐఎన్‌ఎస్‌ విక్రమాదిత్యపై గవర్నరు థావర్‌చంద్‌ గహ్లోత్‌ (మధ్యలో..)

కార్వార, న్యూస్‌టుడే : నౌకాదళం దినోత్సవం సందర్భంగా గవర్నరు థావర్‌చంద్‌ గహ్లోత్‌ శనివారం యుద్ధనౌక ఐఎన్‌ఎస్‌ విక్రమాదిత్యను సందర్శించారు. ప్రస్తుతం దక్షిణ కన్నడ, ఉడుపి, ఉత్తర కన్నడ జిల్లాల పర్యటనలో ఉన్న ఆయన శనివారం ఉదయం కార్వారకు సమీపంలోని ‘కదంబ’ నౌకా స్థావరాన్ని సందర్శించారు. ఆయనకు నౌకాదళం అధికారులు సుశీల్‌ మీనన్‌, మహేశ్‌సింగ్‌, ఇతర ఉన్నతాధికారులు స్వాగతం పలికారు. యుద్ధనౌకను సందర్శించిన గవర్నరుకు అక్కడి ఏర్పాట్ల గురించి అధికారులు వివరించారు. సీబర్డ్‌ రెండో దశ పనుల ప్రత్యేకతలు వెల్లడించారు. రెండు రోజులపాటు గవర్నరు ధర్మస్థల, ఉడుపి, కొల్లూరు, మురుడేశ్వర ప్రాంతాలను సందర్శించారు.