నిందితుడిపై తూటా

ఆసుపత్రి పడకపై స్టార్‌ రాహుల్‌

బెంగళూరు (సదాశివనగర), న్యూస్‌టుడే : మాదక ద్రవ్యాల విక్రయం, రౌడీమామూళ్లు వసూలు చేస్తూ తప్పించుకుని తిరుగుతున్న రౌడీషీటరు రాహుల్‌ అలియాస్‌ స్టార్‌ రాహుల్‌పై హనుమంతనగర పోలీసులు కాల్పులు జరిపి అరెస్టు చేశారు. కుడికాల్లోకి తూటా దిగడంతో గాయపడిన నిందితుడ్ని చికిత్స కోసం స్థానిక ఆసుపత్రిలో చేర్పించారు. మాదక ద్రవ్యాలు విక్రయిస్తున్న ఆరోపణలపై నిందితునిపై 19 కేసులు దాఖలయ్యాయి. న్యాయస్థానం ముందు హాజరుకాని కేసుల్లో ఎనిమిదింటికి వారెంట్లు ఉన్నాయి. కోణనకుంటె సమీపంలోని నారాయణ నగరలో నిందితుడు ఉన్నట్లు గుర్తించి పోలీసులు ఆ ప్రాంతాన్ని చుట్టుముట్టారు. ఎస్సై బసవరాజ పాటిల్‌పై బాకుతో దాడి చేసి పరారయ్యేందుకు ప్రయత్నిస్తున్న అతన్ని లొంగిపోవాలని హెచ్చరించారు. ఎస్సై మాటల్ని పట్టించుకోకుండా పరారవుతుండగా.. ఒక రౌండు కాల్చి అరెస్టు చేశారని డీసీపీ హరీశ్‌ పాండే తెలిపారు.