పొరుగు సాక్ష్యం సరిపోదు

శివాజీనగర, న్యూస్‌టుడే : తన భార్యతో వివాహేతర సంబంధం కలిగి ఉన్నాడంటూ ఓ వ్యక్తిని హత్య చేసిన ఆరోపణలు ఎదుర్కొంటున్న నిందితుడిపై ఇరుగు పొరుగువారు చెప్పిన మాటల ఆధారంగా శిక్షను విధించడం సరికాదని ఉన్నత న్యాయస్థానం స్పష్టం చేసింది. హత్య ఆరోపణలు ఎదుర్కొంటున్న వ్యక్తి ప్రవర్తనను ఇరుగు పొరుగులు ఎలా నిర్ణయిస్తారని జస్టిస్‌ హెచ్‌బీ ప్రభాకరశాస్త్రి, జస్టిస్‌ సీఎం జోషిల నేతృత్వంలోని పీఠం ప్రశ్నించింది. ఇరుగు పొరుగు వాంగ్మూలం ఆధారంగా నిందితునికి జీవిత ఖైదు శిక్షను విధిస్తూ దిగువ న్యాయస్థానం ఇచ్చిన తీర్పును ధర్మాసనం రద్దు చేసింది. మరోసారి దర్యాప్తు చేయాలని పోలీసులను ఆదేశించింది. బాగలకోట హున్డేకర్‌ గల్లీలో ఒక వ్యక్తి హత్యకు గురయ్యాడు. ఒక గృహిణితో వివాహేతర సంబంధం పెట్టుకున్నందుకు, ఆమె భర్తే అతన్ని హత్య చేశారంటూ పోలీసులు కేసు నమోదు చేసుకున్నారు. ఇరుగు పొరుగులు ఇచ్చిన వాంగ్మూలంతోనే కేసు నమోదు చేశారని, దిగువ న్యాయస్థానం జీవిత ఖైదును విధించిందంటూ బాధితుడు వేసుకున్న అర్జీపై విచారణ పూర్తి చేసి న్యాయస్థానం ఈ ఆదేశాలు ఇచ్చింది.