జాతకం చెబుతానంటూ..కడతేరిపోయాడు

బెంగళూరు (మల్లేశ్వరం), న్యూస్‌టుడే : బార్‌లో కూర్చుని భవిష్యత్తు చెబుతానంటూ ఉత్సాహం చూపిన నరేశ్‌ (25) అనే యువకుడు చివరికి కడతేరిపోయాడు. ఈ కేసులో మారిముత్తు అనే యువకుడిని బెంగళూరు గోవిందరాజనగర పోలీసులు శనివారం ఉదయం అరెస్టు చేశారు. పోలీసుల కథనం ప్రకారం.. ఆ ఇద్దరూ మంచి స్నేహితులు. నాగరబావిలోని ఒక బార్‌లో శుక్రవారం మధ్యాహ్నం నుంచి రాత్రి వరకు మద్యం తాగుతూ గడిపారు. మత్తు తలకెక్కిన వేళ.. నీ జాతకాన్ని చెబుతానంటూ నరేశ్‌ ఉబలాటపడ్డాడు. అతని చేయి పట్టుకున్నాడు. ‘నీకు చెడు అలవాట్లు దండిగా ఉన్నాయి. అమ్మాయిల పిచ్చి ఎక్కువ. ఇంకొన్ని సంవత్సరాలలో నువ్వు చనిపోతావు’ అని చెప్పిన అతనితో మారిముత్తులో గొడవకు దిగాడు. బార్‌ నుంచి బయటకు వచ్చిన తర్వాత నరేశ్‌పై దాడి చేసి, కింద పడిన అతని తలపై బండరాయి వేసి హత్య చేసి పరారయ్యాడని పోలీసులు తెలిపారు. హతుని భార్య మహాలక్ష్మి ఇచ్చిన ఫిర్యాదుతో నిందితుని వివరాలను త్వరగా గుర్తించి గోవిందరాజనగర ఠాణా పోలీసులు అరెస్టు చేశారు.