పార్కులు ఏర్పాటుచేయని పాలకులు మాకొద్దు

ఎన్నికలు బహిష్కరిస్తున్నామంటూ కాలనీవాసుల నిరసన

నిరసన తెలుపుతున్న కాలనీవాసులు

కల్లూరు గ్రామీణ, న్యూస్‌టుడే: కర్నూలు నగర పరిధిలోని కల్లూరు 19వ వార్డు నాలుగో తరగతి ఉద్యోగుల కాలనీలో పార్కు స్థలం అన్యాక్రాంతమైందని.. తమకు పార్కు కావాలని ఆ కాలనీ హౌస్‌ ఓనర్స్‌ వెల్ఫేర్‌ అసోసియేషన్‌ డిమాండ్‌ చేశారు. ఈ సంఘం ఆధ్వర్యంలో ఆదివారం నిరసన ప్రదర్శన జరిపారు. కాలనీలో పార్కు స్థలం ఆక్రమణకు గురైనా పాలకులు పట్టించుకోలేదని ఆవేదన వ్యక్తం చేశారు. పార్కులు ఏర్పాటుచేయని పాలకులు తమకొద్దని పేర్కొన్నారు. 10 వేల మందికిపైగా నివసిస్తున్న కాలనీలో ఒక్క ఓవర్‌ హెడ్‌ ట్యాంకు కూడా నిర్మించలేదని.. ఇలాంటి పాలకులు ఎందుకని నిలదీశారు. అందుకే ఎన్నికలు బహిష్కరిస్తున్నామని పేర్కొన్నారు. ఈ కార్యక్రమంలో కాలనీకి చెందిన నాగరాజు, హిదయతుల్లా, వెంకటరమణ, లెనిన్‌, కృష్ణారెడ్డి, బాల సుబ్రహ్మణ్యం, మునిస్వామి పాల్గొన్నారు.